Merkiziy mupettish guruppisi ürümchide seperwerlik yighini achti

Muxbirimiz eziz
2020.10.13

Uyghur diyarida xizmetlerni tekshürüwatqan xitay merkiziy mupettish altinchi guruppisi 13-öktebir küni aptonom rayonluq seperwerlik yighini achqan. Yighin'gha Uyghur aptonom rayonining herqaysi rehberlik qatlimidikiler, shundaqla barliq nazaretlerning bashliqliri qatnashqan. Bashqa wilayet we nahiye rehberliri téléfon yighini sheklide qatnashqan.

Xewerde éytilishiche, xitay merkiziy hökümiti ewetken altinchi mupettish guruppisi guruppa bashliqi wang rongjünning yétekchilikide asasliqi Uyghur diyarining herqaysi jaylirida hökümet xizmetlirining qandaq ishliniwatqanliqini teptish qilidiken. Yighinda wang rongjün herqaysi nazaret we ularning qarmiqidiki idarilerning “Ikkini himaye qilish” we siyasiy hushyarliqni yüksek derijide östürüsh lazimliqini, buning xitay re'isi shi jinpingning yolyoruqi ikenlikini alahide tekitligen. Shundaqla mupettishlik xizmitining yuqiri derijilik partiye teshkilati töwen derijilik partiye teshkilatining “Partiyening rehberlik funkitsiyesini qanchilik ijra qilghanliqi” ni közdin kechüridighan siyasiy nazaret ikenlikinimu tekitligen.

Muhajirettiki bir qisim analizchilar ikki aydin béri ürümchide xizmette boluwatqan mezkur guruppining pütün Uyghur aptonom rayoni miqyasida seperwerlik yighini achqanliqini rehbiriy qatlamdikilerge qaritilghan yéngi bir qétimliq siyasiy basturushning resmiy bashlinishi, dep qarimaqta iken.

Xewerde gerche bu teptish guruppisining Uyghur aptonom rayonidiki yuqiridin töwen'giche bolghan asasliq rehbiriy orundiki kadirlarning türlük intizamlargha ri'aye qilishi hemde ular heqqide tapshuruwélin'ghan erz-shikayetlerge qarap chiqishni muhim wezipe qilghanliqi éytilghan bolsimu, analizchilar buning ötkenki siyasiy heriketlerde aman qalghan axirqi Uyghur rehbiriy kadirlar üchün bir qétimliq apet bolup qélishi mumkinlikini algha sürmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.