Мәркизий мупәттиш гурупписи үрүмчидә сәпәрвәрлик йиғини ачти

Мухбиримиз әзиз
2020-10-13
Елхәт
Пикир
Share
Принт

Уйғур диярида хизмәтләрни тәкшүрүватқан хитай мәркизий мупәттиш алтинчи гурупписи 13-өктәбир күни аптоном районлуқ сәпәрвәрлик йиғини ачқан. Йиғинға уйғур аптоном райониниң һәрқайси рәһбәрлик қатлимидикиләр, шундақла барлиқ назарәтләрниң башлиқлири қатнашқан. Башқа вилайәт вә наһийә рәһбәрлири телефон йиғини шәклидә қатнашқан.

Хәвәрдә ейтилишичә, хитай мәркизий һөкүмити әвәткән алтинчи мупәттиш гурупписи гуруппа башлиқи ваң роңҗүнниң йетәкчиликидә асаслиқи уйғур дияриниң һәрқайси җайлирида һөкүмәт хизмәтлириниң қандақ ишлиниватқанлиқини тәптиш қилидикән. Йиғинда ваң роңҗүн һәрқайси назарәт вә уларниң қармиқидики идариләрниң «иккини һимайә қилиш» вә сиясий һушярлиқни йүксәк дәриҗидә өстүрүш лазимлиқини, буниң хитай рәиси ши җинпиңниң йолйоруқи икәнликини алаһидә тәкитлигән. Шундақла мупәттишлик хизмитиниң юқири дәриҗилик партийә тәшкилати төвән дәриҗилик партийә тәшкилатиниң «партийәниң рәһбәрлик функитсийәсини қанчилик иҗра қилғанлиқи» ни көздин кәчүридиған сиясий назарәт икәнликиниму тәкитлигән.

Муһаҗирәттики бир қисим анализчилар икки айдин бери үрүмчидә хизмәттә болуватқан мәзкур гуруппиниң пүтүн уйғур аптоном райони миқясида сәпәрвәрлик йиғини ачқанлиқини рәһбирий қатламдикиләргә қаритилған йеңи бир қетимлиқ сиясий бастурушниң рәсмий башлиниши, дәп қаримақта икән.

Хәвәрдә гәрчә бу тәптиш гурупписиниң уйғур аптоном районидики юқиридин төвәнгичә болған асаслиқ рәһбирий орундики кадирларниң түрлүк интизамларға риайә қилиши һәмдә улар һәққидә тапшурувелинған әрз-шикайәтләргә қарап чиқишни муһим вәзипә қилғанлиқи ейтилған болсиму, анализчилар буниң өткәнки сиясий һәрикәтләрдә аман қалған ахирқи уйғур рәһбирий кадирлар үчүн бир қетимлиқ апәт болуп қелиши мумкинликини алға сүрмәктә икән.

Пикирләр (0)
Share
Толуқ бәт