Даириләр үрүмчидики аммиви бағчиларда бихәтәрлик тәдбирлирини күчәйтти

Мухбиримиз меһрибан
2015-05-05
Елхәт
Пикир
Share
Принт


Хитайниң һөкүмәт хәвәрлиридә, туюқсиз йүз бериш еһтимали болған һуҗум қилиш вәқәлиридин сақлиниш үчүн,бу йил киргәндин буян үрүмчи шәһридики аммиви бағчиларда бихәтәрлик тәдбирлири күчәйтилгәнлики хәвәр қилинди.

Хитайниң шинҗаң хәвәрләр ториниң 5 - майдики хәвиридә дейилишичә, «үрүмчидики балилар вә яшанғанларниң паалийәт орунлири болған хәлқ бағчиси, су үсти бағчиси, тәңритағ явайи һайванатлар бағчиси, җәнубий бағча, өсүмлүкләр бағчиси, қизилтағ бағчиси, тәңритағ бағчиси қатарлиқ 7 бағчиниң бихәтәрлик тәдбирлири күчәйтилип, бу бағчиларға 5 - айғичә җәми 731 данә синалғулуқ көзитиш апарати, 56 данә бихәтәрлик ишики, 4 данә рентигин нурлуқ апарат, 168 данә шәхсләрни тәкшүрүш әсваби орнитилған вә бағча әтрапиға 2.6 Метир игизликтики өткүр тиғлиқ сим тор 31 миң 539 метир даиридә тартилған. Хәвәрдә йәнә бу аммиви бағчилардики сақчи әтрәтлиригә коча айлинип чарлайдиған сақчи аптомобиллири, кимлик тәкшүрүш үскүнилири, йол тосуш аптомобиллири, йирақтин қоғлап тутуш әсваплири, өткүр тиғдин мудапиәлиниш кийимлири, сақчи калтики, қалқан қатарлиқларниң сәпләп берилгәнлики алаһидә әскәртилгән.

Бултур хитайда «1 - март күнмиң пойиз истансиси пичақлиқ һуҗуми», «30 - април үрүмчи пойиз истансиси пичақлиқ партлитиш һуҗуми», «23 - май үрүмчи әтигәнлик базар һуҗуми» қатарлиқ җамаәт сорунлириға һуҗум қилиш қанлиқ вәқәлири йүз бәргән болуп, хитай даирилири бу вәқәләрни «терорлуқ зораванлиқ вәқәлири» дәп җакарлиған болсиму, әмма чәтәлләрдики уйғур тәшкилатлири вә кишилик һоқуқ тәшкилатлири вәқәләрни пәйда қилған һуҗумчиларниң хитайниң уйғурларға қаритилған диний вә сияситидин нарази болған уйғурларниң қаршилиқ һуҗумлири» дәп тәриплимәктә.

Пикирләр (0)
Share
Толуқ бәт