Da'iriler ürümchidiki ammiwi baghchilarda bixeterlik tedbirlirini kücheytti

Muxbirimiz méhriban
2015-05-05
Élxet
Pikir
Share
Print


Xitayning hökümet xewerliride, tuyuqsiz yüz bérish éhtimali bolghan hujum qilish weqeliridin saqlinish üchün,bu yil kirgendin buyan ürümchi shehridiki ammiwi baghchilarda bixeterlik tedbirliri kücheytilgenliki xewer qilindi.

Xitayning shinjang xewerler torining 5 - maydiki xewiride déyilishiche, "Ürümchidiki balilar we yashan'ghanlarning pa'aliyet orunliri bolghan xelq baghchisi, su üsti baghchisi, tengritagh yawayi haywanatlar baghchisi, jenubiy baghcha, ösümlükler baghchisi, qiziltagh baghchisi, tengritagh baghchisi qatarliq 7 baghchining bixeterlik tedbirliri kücheytilip, bu baghchilargha 5 - ayghiche jemi 731 dane sin'alghuluq közitish aparati, 56 dane bixeterlik ishiki, 4 dane réntigin nurluq aparat, 168 dane shexslerni tekshürüsh eswabi ornitilghan we baghcha etrapigha 2.6 Métir igizliktiki ötkür tighliq sim tor 31 ming 539 métir da'iride tartilghan. Xewerde yene bu ammiwi baghchilardiki saqchi etretlirige kocha aylinip charlaydighan saqchi aptomobilliri, kimlik tekshürüsh üsküniliri, yol tosush aptomobilliri, yiraqtin qoghlap tutush eswapliri, ötkür tighdin mudapi'elinish kiyimliri, saqchi kaltiki, qalqan qatarliqlarning seplep bérilgenliki alahide eskertilgen.

Bultur xitayda "1 - Mart künming poyiz istansisi pichaqliq hujumi", "30 - April ürümchi poyiz istansisi pichaqliq partlitish hujumi", "23 - May ürümchi etigenlik bazar hujumi" qatarliq jama'et sorunlirigha hujum qilish qanliq weqeliri yüz bergen bolup, xitay da'iriliri bu weqelerni "Térorluq zorawanliq weqeliri" dep jakarlighan bolsimu, emma chet'ellerdiki Uyghur teshkilatliri we kishilik hoquq teshkilatliri weqelerni peyda qilghan hujumchilarning xitayning Uyghurlargha qaritilghan diniy we siyasitidin narazi bolghan Uyghurlarning qarshiliq hujumliri" dep teriplimekte.

Toluq bet