Ürümchidiki qattiq boran zerbisidin ayropilanlar uchalmidi

Muxbirimiz ümidwar
2016.05.15

Bir qanche kündin buyan Uyghur rayonining bir qisim jaylirida chiqqan qattiq boran we chang - tozan ahalilarning normal turmush we xizmetlirige dexli qiliwatqanliqi xewer qiliniwatqan bu künlerde 14 - may küni Uyghur aptonom rayon merkizi ürümchi shehirimu qattiq chang - tozanliq boranning hujumigha uchrighan. Netijide ürümchi xelq'ara ayrodromi köp sanda ayropilanlarning uchushi we qonushini toxtitishqa mejbur bolghan.

Shinxu'a torining bu heqtiki uchuride qeyt qilinishiche, 14 - may küni ürümchi xelq'ara ayrodromi qattiq boran tüpeylidin 200 qétim nöwetchi ayropilanlarning uchush - chüshüsh waqtini bikar qilghan we kéchiktürgen.

“Xitay axbarat tori”ning tarqatqan xewiride ilgiri sürülüshiche, mundaq köp sandiki ayropilanlarning uchushi bikar qilinishi sewebidin ayrodromda 5 mingdin artuq yoluchi turup qélishqa mejbur bolghan. Emma, tengri tagh tori ayrodromda turup qalghanlarning 9 ming etrapida ikenlikini xewer qildi.

14 - May küni ürümchi shehiri uchrighan sherqi shimal borinining küchi 6 balgha yetken bolup, aptomobillar we piyadilerning yürüshlirige qiyinchiliq tughdurghan.Kishiler yüzlirini maska, yaghliq qatarliqlar bilen oriwélishqa mejbur bolghan. Ürümchi métrologiye idarisi 13 - may küni ahalilargha sériq renglik bixeterlik agahlandurushi chiqirip, 15 - mayghiche ürümchining bezi jaylirida shamal küchining hetta 10 balgha yétishi mumkinlikini agahlandurghan. Nur torining xewiride ilgiri sürülüshiche, 14 - may künidiki qattiq boran aqiwitide bir adem hayatidin ayrilghan,20 nechche adem éghir - yénik derijide yarilan'ghan.

Ekologiye mutexessislerning qarishiche, yéqinqi yillardin buyan, türlük sewebler tüpeylidin Uyghur rayonining ékologiyilik tengpungluqning buzulushi künsayin éghirlashqan bolup, tarim wadisidiki toghraqliqlarning késilip azlishi, su bayliqlirining qalaymiqan échilishi we heddidin ziyade köp yer asti énérgiye bayliqlirini échish, hetta muzluqlarning érishi we bashqa türlük mesililermu körülmekte iken

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.