Үрүмчидики қаттиқ боран зәрбисидин айропиланлар учалмиди

Мухбиримиз үмидвар
2016-05-15
Share

Бир қанчә күндин буян уйғур райониниң бир қисим җайлирида чиққан қаттиқ боран вә чаң - тозан аһалиларниң нормал турмуш вә хизмәтлиригә дәхли қиливатқанлиқи хәвәр қилиниватқан бу күнләрдә 14 - май күни уйғур аптоном район мәркизи үрүмчи шәһириму қаттиқ чаң - тозанлиқ боранниң һуҗумиға учриған. Нәтиҗидә үрүмчи хәлқара айродроми көп санда айропиланларниң учуши вә қонушини тохтитишқа мәҗбур болған.

Шинхуа ториниң бу һәқтики учуридә қәйт қилинишичә, 14 - май күни үрүмчи хәлқара айродроми қаттиқ боран түпәйлидин 200 қетим нөвәтчи айропиланларниң учуш - чүшүш вақтини бикар қилған вә кечиктүргән.

"хитай ахбарат тори"ниң тарқатқан хәвиридә илгири сүрүлүшичә, мундақ көп сандики айропиланларниң учуши бикар қилиниши сәвәбидин айродромда 5 миңдин артуқ йолучи туруп қелишқа мәҗбур болған. Әмма, тәңри тағ тори айродромда туруп қалғанларниң 9 миң әтрапида икәнликини хәвәр қилди.

14 - Май күни үрүмчи шәһири учриған шәрқи шимал борининиң күчи 6 балға йәткән болуп, аптомобиллар вә пиядиләрниң йүрүшлиригә қийинчилиқ туғдурған.Кишиләр йүзлирини маска, яғлиқ қатарлиқлар билән оривелишқа мәҗбур болған. Үрүмчи метрологийә идариси 13 - май күни аһалиларға сериқ рәңлик бихәтәрлик агаһландуруши чиқирип, 15 - майғичә үрүмчиниң бәзи җайлирида шамал күчиниң һәтта 10 балға йетиши мумкинликини агаһландурған. Нур ториниң хәвиридә илгири сүрүлүшичә, 14 - май күнидики қаттиқ боран ақивитидә бир адәм һаятидин айрилған,20 нәччә адәм еғир - йеник дәриҗидә яриланған.

Әкологийә мутәхәссисләрниң қаришичә, йеқинқи йиллардин буян, түрлүк сәвәбләр түпәйлидин уйғур райониниң екологийилик тәңпуңлуқниң бузулуши күнсайин еғирлашқан болуп, тарим вадисидики тоғрақлиқларниң кесилип азлиши, су байлиқлириниң қалаймиқан ечилиши вә һәддидин зиядә көп йәр асти енергийә байлиқлирини ечиш, һәтта музлуқларниң ериши вә башқа түрлүк мәсилиләрму көрүлмәктә икән

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт