Үрүмчи даирилири хитай көчмәнлириниң олтурақлишишини асанлаштуридиған “тәпсилий қаидә” елан қилған

Мухбиримиз ирадә
2022.04.14
Share on WhatsApp
Share on WhatsApp

Хитай һөкүмити үрүмчигә көпләп хитай көчмәнләрни йәрләштүрүш үчүн йеқинда үрүмчиниң нопусқа елиш хизмәтлириниң асанлаштурудиғанлиқини елан қилған иди. 14- Април күни даириләр “үрүмчи шәһиригә нопус көчүрүп кириш сияситини йолға қоюштики тәпсилий қаидә” ни елан қилип, сәккиз хил нопусқа елиш усулиниң илтимас қилиш шәрти вә керәклик материяллирини бәлгилигән.

Хитайдики “хәлқ тори” ниң хәвәр қилишичә, юқириқи бу “тәпсилий қаидә” дә, оқуш тарихи бойичә нопусқа елиш, алий мәктәптә оқуватқан оқуғучиларни нопусқа елиш, аталмиш “кәспий техника ихтисаслиқлири” ни нопусқа елиш, “кәспий маһарәт ихтисаслиқлири” ни нопусқа елиш, мәбләғ селиш, игилик тикләш, ишқа орунлишиш бойичә нопусқа елиш, маканлаштуруп нопусқа елиш, әр-хотун, пәрзәнт, қериндашлар ара панаһландуруп нопусқа елиш, һәрбий сәптин чекингән әскәрләр вә уларниң уруқ-туғқанлирини нопусқа елиштин ибарәт сәккиз хил нопусқа елиш усули көрситип берилгән.

Хитай һөкүмити 2017- йилидики кәң көләмлик тутқун қилиш вә лагерға қамаш һәрикитидин илгири үрүмчидә һәрхил кәсипләр билән шуғуллиниватқан уйғурларни мәҗбурий һалда юртлириға қайтуруп, үрүмчидики көчмә нопустики уйғурларни асасән тазилап болған иди. Хитай даирилири урүмчини кәлгүсидә 5 милйонлуқ нопусқа игә оттура асиядики әң чоң шәһәргә айландуруш үчүн, ичкиридин аталмиш “ихтисаслиқ хадим”, “алий мәктәп пидаийлири”, “мәбләғ салғучилар” дегәндәк намларда түркүмләп хитай көчмәнлирини йөткәп келип олтурақлаштурушқа башлиши, диққәт қозғимақта.

Чәт әлләрдики уйғур көзәткүчиләр буни хитай һөкүмитиниң уйғурларға өз земинида хатирҗәм яшаш һоқуқи бәрмәй, уларни тутқун қилиш, солаш, ғайип қилиш, ешинча әмгәк күчи баһанисида хитай өлкилиригә йөткәп тарқақлаштуруштәк вастиләр билән йоқатқандин кейинки йәнә бир ассиимлатсийә сиясити икәнликини билдүрүшмәктә.

Мәлум болушичә, бу “тәпсилий қаидә” дә, нопусқа алдуруш рәсмийитини беҗирмәкчи болған аһалиләр кирәклик материялларни елип “нопусни көчүрүп кириш илтимасини тәкшүрүп тәстиқлаш җәдвили” ни толдурсила, бәш хизмәт күни ичидә “көчүп киришкә рухсәт қилиш испати” ни алалайдикән.

Һалбуки, әйни чағда үрүмчидә хизмәт қилған вә оқуған чәт әлликләр үрүмчидә вақитлиқ туруш кинишкиси биҗиришниң интайин қейинлиқини, уйғур көчмә нопуслар үчүн бундақ рәсмийәтләрниң техиму қейинлиқини, уларниң барлиқ һөҗҗәтлири толуқ болсиму, әмма кинишка алалмай қаттиқ қийнилидиғанлиқини инкас қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт