Үрүмчи җ х идариси йеңи туғулған бовақларниң исимлирини тәкшүрүш үчүн йеңи мулазимәт түри йолға қойған

Уйғур аптоном районлуқ даириләр йеңи туғулған бовақларниң исимлирини башқуруш-тәкшүрүш хизмитини йәнә бир қәдәм күчәйткәнликини җакарлиди.

Тәңритағ ториниң бу һәқтики хәвиригә қариғанда, үрүмчи шәһәрлик җамаәт хәвпсизлик идариси йеңи туғулған бовақларниң исимлирини тәкшүрүш вә шундақла исим өзгәртиш үчүн мәхсус бир мулазимәт түри йолға қойған. Ата-анилар балилириниң туғулған испат қәғизини көтүрүп, өзлири турушлуқ җайлардики сақчихана яки җ х тармақлириға берип балилириға қойған исимниң мувапиқ болған яки болмиғанлиқини тәкшүртидикән.

Хәвәрдә илгири сүрүлүшичә, бу мулазимәт түриниң йолға қоюлуши балиларниң кейинки оқуш вә хизмәт һаятида охшаш исимликләр көп болуп кетиш, уларниң турмушиға қийинчилиқ туғдуруш еһтималлиқиниң алдини елиш үчүн икән.

Бирақ чәтәлләрдики уйғур көзәткүчиләр буниң асаслиқ уйғур балилириниң исимлирини контрол қилиш билән мунасивәтлик икәнликини илгири сүрмәктә. Чүнки хитай һөкүмити уйғур елидә лагер түзүмини йолға қоюп, бастурушни күчәйткән йеқинқи икки йил мабәйнидә уйғур балилириға қоюлған исламий исимларниму өзгәртиш һәрикитини елип барған иди.

Радийомиз 2017-йили 4-айда уйғур аптоном районлуқ даириләрниң һәрқайсий җайларға қоюқ исламий пураққа игә болған 29 хил исимни чәкләш һәққидә буйруқ чүшүргәнликини дәлиллигән иди. Уқтуруш бойичә йеңи туғулған бовақларла әмәс, 16 яштин төвән балиларниң исимлириму өзгәртилгән иди. Уйғур аптоном районлуқ һөкүмәтниң рәсмий орган гезити болған “шинҗаң гезити” дә тохтимай бесилған исим өзгәртиш еланлири мәзкур буйруқниң кәң көләмдә иҗра қилинғанлиқини испатлап бәргән.

Бүгүн тәңритағ торида елан қилинған хәвәрдә үрүмчи шәһәрлик җамаәт хәвпсизлик идариси йолға қойған бу мулазимәт түри бойичә 16 яштин юқириларниңму илтимас йезип, исим өзгәртсә болидиғанлиқи тилға елинған.

Уйғур аптоном районлуқ даириләр 2017-йилидин башлап, уйғурларниң балилириға муһәммәд, муһаҗит, сәйпулла, хәдичә қатарлиқ 29 хил исим қоюшини чәклигән вә бундақ исимлик балиларниң нопусқа елинмайдиғанлиқи вә мәктәпләргә қобул қилинмайдиғанлиқини җакарлиған иди. Әйни чағда кишилик һоқуқ органлири хитайниң һәрикитини қаттиқ тәнқидләп, буни кишилик һоқуқ вә әркин ирадигә қилинған еғир таҗавузчилиқ, дәп көрсәткән иди.