Хитайниң уйғур елидә турушлуқ һәрбий қисимлири билән қораллиқ сақчи қисимлириниң уруш тәйярлиқи қилишқа сәпәрвәрлик қилиниши диққәт қозғиди

Мухбиримиз ирадә
2020-05-28
Елхәт
Пикир
Share
Принт

Хитайниң уйғур елидә турушлуқ һәрбий қисимлири билән қораллиқ сақчи қисимлириниң нөвәттә кәң көләмлик әмәлий җәң мәшиқигә киришкәнлики мәлум.

Хитайниң «шинҗаң гезити» дә елан қилинған хәвәрләргә қариғанда, хитайниң уйғур елидә турушлуқ һәрбий қисимлири билән қораллиқ сақчи қисимлири нөвәттә хитай дөләт рәиси ши җинпиңниң бейҗиңда ечиливатқан икки қурултай мәзгилидә қилған сөзигә бинаән һәрбий мәшиқ вә уруш тәйярлиқи сәвийәсини юқири көтүрүшкә җиддий атланған.

Униңда «ши җинпиңниң чақириқиға бинаән 5-айниң 26-күни чүштин кейин шинҗаң һәрбий райони универсал мәшиқ мәйданида әмәлий җәң мәшиқи қизип кәтти,» дейилгән.

Хитай дөләт рәиси ши җинпиң икки қурултай мәзгилидә хитай хәлқ азадлиқ армийәси вә хитай қораллиқ сақчи қисимлириниң вәкилләр йиғинида сөз қилип, уруш тәйярлиқини күчәйтишни тәкитлигән иди. У шу күнидики сөзидә «биз чоқум һәрбий мәшиқини омумйүзлүк күчәйтип, урушқа тәйярлиқ қилишимиз, һәр хил мурәккәп әһвалларни вақтида вә үнүмлүк бир тәрәп қилип, дөләтниң игилик һоқуқи, бихәтәрлики, омумий истратегийәлик муқимлиқини қоғдишимиз керәк,» дегән. Униң бу сөзи чәтәл ахбаратлириниң диққитини қозғиған иди.

«Шинҗаң гезити» ниң хәвиридә уйғур елидә турушлуқ һәрбий қисимлар вә қораллиқ қисимларниң ши җинпиңниң чақириқини қизғин қоллап, «биз барлиқ ой-пикирлиримизни уруш тәйярлиқиға мәркәзләштүрүшимиз керәк, урушқа үнүмлүк тәйярлинип, җәң вәзиписини орундашқа капаләтлик қилишимиз керәк,» дегәнлики тәкитләнгән.

Хитайниң америка билән болған мунасивәтлири қаттиқ кәскинлишиватқан бир пәйттә уйғур елидики хитай һәрбий қисимлири билән қораллиқ сақчи қисимлириниң җиддий түрдә әмәлий җәң мәшиқигә киришиши диққәт қозғимақта.

Пикирләр (0)
Share
Толуқ бәт