Америка муавин президенти сеулға йетип кәлди

Мухбиримиз үмидвар
2017.04.16
Share on WhatsApp
Share on WhatsApp

Америка муавин президенти майк пенс йәкшәнбә күни җәнубий корийә пайтәхти сеулға йетип келип, өзиниң җәнубий корийә, японийә, һиндонезийә,австралийә қатарлиқ асия-тинч окян райони әллиригә қаратқан он күнлүк рәсми зияритини башлиди. Муавин президент майк пенс сеулда америка һәрбий хадимлири билән бирликтә черковға берип, пасха байримини тәбрикләш паалийитигә қатнашти вә башқа бир қисим паалийәтләрни елип барди. У җәнубий корийә баш министири қатарлиқ али рәһбәрлири билән учришип, икки дөләт һәмкарлиқлири мәсилиси һәққидә сөзләшмәкчи.

Майик пенсниң җәнуби корийә сәпири шимали корийәниң йәнә бир қетимлиқ ракета синиқиға тоғра кәлгән болуп, мәзкур ракета синиқи шәнбә күни шимали корийә һөкүмити пийоңяңда зор көләмдә һәрбий парат өткүзүп, өзиниң һәрбий күчини намайән қилған күниниң әтиси елип берилған болсиму, әмма мувәппәқийәт қазиналмиған.

Америка авазиниң хәвәр қилишичә, америка тинч окян қоманданлиқ шитаби шимали корийәниң ракетаси қоюп берилиш билән тәңла партлап кәткәнлики, америка тәрәпниң һазир бу ракетаниң типини ениқлаватқанлиқини билдүргән.

Америка муавин президенти пийоңяңниң мәзкур ракета синиқи мәғлуп болуп, бир қанчә саәт өткәндин кейин сеулға йетип кәлгән.

Майк пенс һәптиниң иккинчи күни японийә зияритини башлайду вә японийә баш министири шинзо абе билән икки дөләт арисидики һәмкарлиқлар, җүмлидин иқтисадий мунасивәтләр һәққидә сөзлишиду.

Мәлумки, шимали корийәниң изчил ядро синиқи елип бериши җәнуби корийә вә японийәгә биваситә тәһдит пәйда қилип келиватқан болуп, бу қетим корийә йерим арили кризиси күчәйгәндә, пийоңяң сеулға йәнә тәһдит селиш позитсийәсини билдүргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.