Uyghur ösmürlerge süt arqiliq kompartiye idé'ologiyisi singdürülmekte

Uyghur diyaridiki ösmürlerge süt arqiliq kompartiyeni söyüsh terbiyisi bériliwatqanliqi bügün xitay hökümet axbaratida yer aldi hemde tégishlik ghulghuligha seweb boldi.

Xitay hökümet taratquliridin “Yer shari waqti géziti” ning 22-apréldiki xewiride éytilishiche, Uyghur diyarda oqush yéshidiki 240 ming ösmür “Heqsiz süt” bilen teminlen'gen. Mezkur xewerde déyilishiche, bu ösmürler bu “Sütlerdin huzur élish bilen birge süt qépigha yézilghan partiyeni medhiyilesh heqqidiki naxshilarni éytqan.”

Melum bolushiche, bu tür ürümchi shehiridiki alaqidar hökümet tarmaqliri 15-apréldin bashlap ijra qilishqa kirishken “Alte yashtin töwen ösmürlerge her küni bir qap süt tarqitish” pa'aliyitining asasiy mezmuni iken. Mezkur süt qépining arqa yüzige “Partiye méning anam” namliq tékist muzika notisi bilen bésilghan bolup, “Söyümlük we ulugh partiye anam manga aq süt bérip baqmaqta. Méni inqilab yoligha bashlimaqta,” dégen mezmunlar asasiy orunni igileydiken. Bu shé'irlar 1980-yilliri yézilghan bolup, xitayda alliqachan kishiler untup ketken shé'irlar iken.

Muhajirettiki alaqidar pa'aliyetchiler bu heqte inkas qayturup, “Xitay hökümiti Uyghur ösmürlerge süt bérish namida sebiylerge ‛qizil terbiye teshwiqati‚ ni singdürmekchi bolghan. Bu shekli özgergen aldamchiliqtin bashqa nerse emes,” dégenlerni ilgiri sürmekte.