Хитайда 2017-йили телефон, интернетларни кимлик бойичә тизимлитиш әмәлийлишидиғанлиқи елан қилинди

Хитай хәлқ ториниң 31-январдики хәвиридә 1-февралдин башлап, пүткүл хитай бойичә муқим телефон вә көчмә телефонларни өз ичигә алған барлиқ телефон абонтлириниң кимлик бойичә тизимлитиш әмәлийлишидиғанлиқи, интернет қолланғучилириниң кимлик бойичә тизимлитиши бу йил 6-айниң 1-күнигичә пүткүл хитай бойичә йолға қоюлидиғанлиқи хәвәр қилинди.

Википидиядики учур амбиридин мәлум болушичә, хитайда телефон абонтлириниң кимлик бойичә тизимлитишни тәләп қилиниши 2012-йилдин башлап хитайдики бир қисим районларда йолға қоюлушқа башлап, 2017-йили 1-айниң 31-күнигичә пүтүн хитайда омумлаштуруп болуш уқтурулған. Интернетни кимлик бойичә тизимлитиш лайиһәси 2015-йили 6-айда хитай мәмликәтлик хәлқ қурултийиға сунулған, 2016-йили 11-айниң 7-күни ечилған 12-нөвәтлик хәлқ қурултийиниң 24-нөвәтлик йиғинида қарардин өтүп, 2017-йили 6-айниң 1-күнидин башлап иҗра қилиш елан қилинған.

Хитай даирилири йиллардин буян телефон алақиси вә интернеттики учурларни қамал қилишни күчәйтип келиватқан болуп, хитай пуқралириниң учур әркинлики мәсилиси хәлқараниң диққитини қозғиған мәсилиләрниң бири. Кишилик һоқуқ тәшкилатлири хитайни бу мәсилидә үзлүксиз тәнқидләп келиватқан болуп, уйғур диярида 2009-йили йүз бәргән 5-июл үрүмчи вәқәсидин кейин, интернет вә телефонда қанунсиз диний учурларни йоллиған, һөкүмәт чәклигән хәвәрләрни көргән вә тарқатқан дегән баһанидә тутқун қилинип, еғир җазаға учриған уйғурлар мәсилиси хәлқара таратқулардики қизиқ нуқтиларниң биригә айланған иди.