Хитай хәлқ қурултийи тәкшүрүш өмики уйғур елидә аптономийә қануниниң әмәлийлишишини тәкшүрмәкчи

Мухбиримиз меһрибан
2013.07.30

30-Июл күни хитай мәмликәтлик хәлқ қурултийи тәшкиллигән мәхсус өмәк, уйғур аптоном райониниң аптономийә қануниниң әмәлийлишишини тәкшүрүш үчүн үрүмчигә йетип кәлгән.

Хитайниң һөкүмәт мәтбуатлиридин тәңритағ ториниң хәвиридин мәлум болушичә, бу өмәккә хитай мәмликәтлик хәлқ қурултийиниң даимий һәйити, хитай мәмликәтлик хәлқ қурултийиниң миллий ишлар ишханисиниң мудири, мәркизи партийә мәктипиниң муавин мудири қатарлиқ вәзипиләрни өтәватқан или җиңтйән йетәкчилик қилған. Хәвәрдә йәнә бу өмәкниң 30-июл күни чүштин илгири уйғур аптоном райониниң әмәлдарлири билән елип берилған сөһбәт йиғинида, уйғур аптоном райониниң муавин рәиси җарулла һисамидинниң уйғур аптоном районида аптономийә қануниниң иҗра қилиниш әһвали һәққидә бәргән доклатини аңлиғанлиқи алаһидә тилға елинған.

Хитай мәтбуатлириниң бу қетимқи тәкшүрүш һәққидә бәргән хәвәрлиридә, уйғур аптоном райониниң йеқинқи 30 йиллиқ тәрәққиятида аптономийилик қанунларниң капаләткә игә қилинғанлиқини, әмма йәнила бәзи мәсилиләр сақланғанлиқи үчүн мәркизи һөкүмәтниң бу қетим мәхсус өмәк тәшкилләп әвәткәнлики әскәртилди.

Хитай вәзийитини көзәткүчи анализчилар болса, районда арқа-арқидин йүз бериватқан һөкүмәткә қарши наразилиқ һәрикәтлири сәвәбидин, хитай мәркизи һөкүмити “хәлқ қурултийиниң тәкшүрүш өмики” намидики бу өмәкни әвәткән болуши мумкинликини тәкитлимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.