Uyghur aptonom rayoni da'iriliri Uyghur ayallirini mejburiy tughmas qilghanliqini inkar qildi

2021-01-11
Share

Uyghur aptonom rayoni da'iriliri 11-yanwar bayanat élan qilip, Uyghur ayallirini mejburiy tughmas qilghanliqini inkar qilghan. Birleshme agéntliqining xewer qilishiche, Uyghur aptonom rayonluq hökümetning mu'awin bayanatchisi shu guyshyang taratqulargha söz qilip, tughut kontrol qilish qararini shexslerning oz iradisi bilen bergenliki, uninggha "Herqandaq bir teshkilat yaki shexsning arilashmighanliqi" ni ilgiri sürgen.

Ötken yili gérmaniyelik tetqiqatchi doktor adriyan zénz xitayning hökümet höjjetlirige asasen doklat élan qilip, Uyghur nopusining 2017-yildin béri shiddetlik aziyip ketkenliki, xitay da'irilirining Uyghur ayallirini mejburiy tughmas qiliwatqanliqini ashkarilighan. Bu doklat dunyada qattiq ghulghula qozghap, buning "Irqiy qirghinchiliqqa" kiridighanliqi ilgiri sürülgen. Xitay hökümiti buninggha qarshi doklat élan qilip, Uyghur nopusining aziyip ketkenlikini inkar qilghan.

Bolupmu xitayning washin'gtondiki elchixanisining tiwittirda uchur yollap, Uyghur ayallirining "Bala tughush mashinisi bolushtin xali bolghanliqi" ni ilgiri sürüshi xelq'arada téximu qattiq ghulghula qozghighanidi. Birleshme agéntliqning bildürüshiche, shu guyshyang Uyghur nopusining bashqa milletlerdin jiq köpiyiwatqanliqi, Uyghur ayallirigha "Mejburiy üzük saldurdi yaki bala chüshürüshke mejburlidi, déyishning téximu yaman gherezlik" ikenlikini tekitligen. Biraq u milyonlighan Uyghurning lagérlargha qamilishi, xitay karxanilirida mejburiy emgekke sélinishining Uyghur nopusigha körsetken tesirini tilgha almighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet