"Atlantik" zhornilida xitayning zulumidin qéchip chet ellerde yashawatqan Uyghur ayallirining qéyinchiliqliri tonushturuldi

Muxbirimiz irade
2021-04-08
Share

Amérikaning nopuzluq metbu'atliridin bolghan "Atlantik" zhornilida "Uyghur ayalliri üchün shinjangdin ketkenlik xitayning alqinidin qéchip qutulghanliq bolmidi" mawzuluq bir parche zor kölemlik maqale élan qilindi.

Maqalide xitayning 2017-yilidin bashlap Uyghurlargha qaratqan zor kölemlik basturush herikitining netijiside erliridin ayrilip qélip türkiye qatarliq döletlerde musapirchiliqning pütkül musheqqetliri bilen yalghuz köresh qilishqa mejbur bolghan Uyghur ayallirining hékayiliri bayan qilin'ghan.

Maqalida xitayning yolyoruqi bilen misirdiki Uyghurlarni tutqun qilish bashlan'ghanda erliri tutulup kétip, baliliri bilen yalghuz türkiyege qéchip kelgen, éri chet elge chiqalmay xitayning lagérigha qamalghan yaki bolmisa wiza cheklimisi seweblik chet ellerde ayrim-ayrim döletlerde yashap birlishelmeywatqan, qisiqisi oxshimighan sewebler bilen oxshash qismetlerge yoluqqan Uyghur ayallirining musapirliqtiki mujadilisi bayan qilin'ghan. Aptor maqalisida türkiye qatarliq döletlerde yashawatqan Uyghur ayallirining yashashni dawamlashturush kürishi, qéyinchiliqliri we ularning öz-ara mürini mürige tirep turup yashashtek qeyser rohini tepsiliy yorutup bergen.

Maqalide dunya Uyghur qurultiyining axbaratqa mes'ul dériktori zumret'ay erkin ziyaret qilin'ghan. Zumret'ay chet ellerdiki Uyghur ayallirining qéyinchiliqlirining nezerdin saqit qilin'ghanliqini, chünki hemme kishining diqqiti lagérlargha merkezliship qélip, uning yandash tesirlirige yéterlik diqqetke érishelmey qalghanliqini bildürgen. U: "Uyghurlargha qaritilghan basturushni 'köp tereplimilik krizis' dep chüshinish kérek, bu kirizisning nurghun terepliri nezerdin saqit qilindi," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet