Хитай һөкүмитиниң уйғур аяллирини зор көләмдә туғмас қиливатқанлиқи хәлқара ахбаратларда диққәт қозғиди

Мухбиримиз ирадә
2021-04-15
Share

Уйғур аяллириниң хитай һөкүмити тәрипидин пиланлиқ вә системилиқ һалда туғмас қилиниватқанлиқи японийә вә америка мәтбуатлириниң зор диққитини қозғиди. Йеқинда японийәниң нопузлуқ гезитлиридин болған "санкәй шимбон" хәвәр тори уйғур елида аяллар бөлүми дохтури болуп хизмәт қилған гүлгинә ханимни зиярәт қилип бу һәқтә мәхсус хәвәр тарқатқан.

Гүлгинә ханим үрүмчидә мәзгилидә хизмәт қилған дохтурханида өзиниң туғмас қилиш оператсийәлиригә бивастә қатнашқанлиқини ейтип "бәзи вақитларда дохтурханида бир күндила 80 қетим туғмас қилиш оператсийәси қилинатти" дегән.

У йәнә нурғун аялларниң йүк машинисиниң кәйнигә селинип дохтурханиға әвәтиләтти, 5 минут кетидиған бу оператсийәдә аяллар өзлиригә немә болидиғанлиқиниму билмәйдиғанлиқини ейтқан. Гүлгинә ханим йәнә, хитайниң уйғур аяллирини туғмас қилиш сияситини 1980-йиллардин тартипла иҗра қилған болсиму, бирақ 2014-йилидин кейин буниң мисли көрүлмигән дәриҗидә ашқанлиқини ейтқан.

Гүлгинә ханим билән өткүзүлгән бу сөһбәт 14-април күни йәнә, америкадики нопузлуқ гезитләрдин болған "хәвәр һәптилики" диму тарқитилған. Хәвәрдә, гүлгинә ханимниң японийә гезитигә бәргән гуваһлиқидин сирт, тәтқиқатчи адриян зензниң мәхсус доклатиму тилға елинип, хитай һөкүмитиниң уйғурларға ирқий қирғинчилиқ йүргүзүватқанлиқи испатлири билән баян қилинған.

Адриян зенз 2020-йили 6-айда елан қилған муһим доклатида хитай һөкүмити вә бәзи йәрлик һөкүмәтләр өзи елан қилған һөҗҗәт вә истатестикиларға асаслинип туруп, 2019-йили уйғур райониниң җәнубидики үч вилайәт, бир областта туғут йешидики аялларниң кәм дегәндә 80% тигә үзүк селип һамилидарлиқтин сақлиниш тәдбири елинғанлиқини, уйғур аптоном райони 2017-йилдин бурун хитайдики туғуш нисбити әң юқири район болсиму, 2017-йилдин башлап хитайдики туғуш нисбити әң төвән районға айланғанлиқи ашкарилиған. Әйни чағда бу доклат уйғурларға қарита ирқий қирғинчилиқ йүргүзүлүватқанлиқиниң дәсләпки испатлири сүпитидә зор хәлқаралиқ инкас қозғиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт