Xitay hökümitining Uyghur ayallirini zor kölemde tughmas qiliwatqanliqi xelq'ara axbaratlarda diqqet qozghidi

Muxbirimiz irade
2021-04-15
Share

Uyghur ayallirining xitay hökümiti teripidin pilanliq we sistémiliq halda tughmas qiliniwatqanliqi yaponiye we amérika metbu'atlirining zor diqqitini qozghidi. Yéqinda yaponiyening nopuzluq gézitliridin bolghan "Sankey shimbon" xewer tori Uyghur élida ayallar bölümi doxturi bolup xizmet qilghan gülgine xanimni ziyaret qilip bu heqte mexsus xewer tarqatqan.

Gülgine xanim ürümchide mezgilide xizmet qilghan doxturxanida özining tughmas qilish opératsiyelirige biwaste qatnashqanliqini éytip "Bezi waqitlarda doxturxanida bir kündila 80 qétim tughmas qilish opératsiyesi qilinatti" dégen.

U yene nurghun ayallarning yük mashinisining keynige sélinip doxturxanigha ewetiletti, 5 minut kétidighan bu opératsiyede ayallar özlirige néme bolidighanliqinimu bilmeydighanliqini éytqan. Gülgine xanim yene, xitayning Uyghur ayallirini tughmas qilish siyasitini 1980-yillardin tartipla ijra qilghan bolsimu, biraq 2014-yilidin kéyin buning misli körülmigen derijide ashqanliqini éytqan.

Gülgine xanim bilen ötküzülgen bu söhbet 14-april küni yene, amérikadiki nopuzluq gézitlerdin bolghan "Xewer heptiliki" dimu tarqitilghan. Xewerde, gülgine xanimning yaponiye gézitige bergen guwahliqidin sirt, tetqiqatchi adriyan zénzning mexsus doklatimu tilgha élinip, xitay hökümitining Uyghurlargha irqiy qirghinchiliq yürgüzüwatqanliqi ispatliri bilen bayan qilin'ghan.

Adriyan zénz 2020-yili 6-ayda élan qilghan muhim doklatida xitay hökümiti we bezi yerlik hökümetler özi élan qilghan höjjet we istatéstikilargha asaslinip turup, 2019-yili Uyghur rayonining jenubidiki üch wilayet, bir oblastta tughut yéshidiki ayallarning kem dégende 80% tige üzük sélip hamilidarliqtin saqlinish tedbiri élin'ghanliqini, Uyghur aptonom rayoni 2017-yildin burun xitaydiki tughush nisbiti eng yuqiri rayon bolsimu, 2017-yildin bashlap xitaydiki tughush nisbiti eng töwen rayon'gha aylan'ghanliqi ashkarilighan. Eyni chaghda bu doklat Uyghurlargha qarita irqiy qirghinchiliq yürgüzülüwatqanliqining deslepki ispatliri süpitide zor xelq'araliq inkas qozghighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet