Qaranchuqsiz qalghan Uyghur balilirining aqiwiti küchlük endishe qozghimaqta

Muxbirimiz irade
2018-09-27
Élxet
Pikir
Share
Print

Uyghur élida ata-aniliri lagérgha tutqun qilin'ghanliqtin qaranchuqsiz qalghan minglighan Uyghur perzentlirining teqdiri küchlük endishe qozghimaqta.

Bu heqte yéqindin buyan radiyomiz we bashqa xelq'araliq axbaratlar muxbirlirining ehwal igilishi netijiside pütün a'ilisi tutqun qilin'ghan balilarning hazir türkümlep quruluwatqan daril'étamlargha yighiwélin'ghandin kéyin xuddi ata-anilirigha oxshashla bir qatar "Terbiyelesh" tin ötküzülüwatqanliqi melum bolmaqta.

"Zimistan" namliq diniy erkinlik we kishilik hoquq tor zhurnilining yerlik uchur menbeliridin igiligen uchurigha qarighanda, bortala shehirining özidila 200 din oshuq qaranchuqsiz qalghan bala yétimxanilargha yighiwélin'ghan iken. Bu balilarmu xuddi ata-anilirigha oxshashla partiyeni söyüsh terbiyesi we xitay tilini öginishke mejburliniwatqan bolup, bu balilarning eng kichiki téxi emdi 2 yash iken.

Mezkur tor zhurnili yene korla, bortala we qumul sheherliridin tutqun qilinip lagérgha élip kétilgen ata-anilarning qaranchuqsiz qalghan baliliri we ularning ichidin bezilirining bowa-momilirigha qalghan bolsa yene bezilirining yétimxanilargha élip kétilgenliki, yene bezi balilarning özidin kichik ini-singillirining halidin xewer élishqa mejbur boluwatqanliqi heqqide bir qisim uchurlarni teminlep, bir kéchide tirik yétimgha aylan'ghan Uyghur baliliri uchrawatqan qismetlerning intayin éghirliqini bayan qilghan.

24-Séntebir küni, "Washin'gton pochtisi" gézitimu bu heqte bir tehrirat maqalisi élan qilip, xitay hökümitining qilmishini "Alliqachan tarixtin yütken wehshiyane siyasetni yéngiwashtin ijra qilish" dep eyibligen idi.

Mezkur maqalide hazir herxil namlardiki daril'étamlargha ewetiliwatqan gödeklerning ata-anilirigha oxshashla öz ana tilidin we islam étiqadidin waz kechtürülüp, xitayche sözleshke, xitay kompartiyesini söyüshke mejburliniwatqanliqi bayan qilin'ghan. Xewerde bu ehwal "'medeniyet zor inqilabi' din buyanqi eng zor insan heqliri depsendichiliki" dep teswirlen'gen.

Toluq bet