"уйғур бирлики" дуня илим саһәсигә уйғур қирғинчилиқи һәққидә мураҗиәт йоллиди

Мухбиримиз әзиз
2021-03-04
Share

Хитай сиртидики һәр саһә алимлири вә тәтқиқатчилириниң халис уюшуши билән тәшкилләнгән "уйғур бирлики" җәмийити 3-март күни дуняниң һәрқайси җайлиридики илмий тәтқиқат билән шуғуллиниватқан барлиқ хадимларға очуқ мураҗиәт йоллап, уларни уйғурлар дуч келиватқан ирқий қирғинчилиққа қарши турушқа бир кишилик һәссисини қошушқа чақирди.

Очуқ мураҗиәтнамида хитай һөкүмитиниң уйғурларға йүргүзиватқан ирқий қирғинчилиқиниң җанлиқ пакитлири чүшинишлик баян қилиниш билән биргә, хитай һөкүмити елан қилған түрлүк һөҗҗәтләрниңму нөвәттики қирғинчилиқни әкс ‍әттүридиғанлиқи алаһидә тәкитләнди. Шуниңдәк дуняниң һәрқайси җайлиридики алимларни хитай һөкүмитиниң бу хил вәһшиянә қирғинчилиқини әйибләш һәмдә уйғурларни һемайә қилишқа чақирди. Мураҗиәтнамида "уйғурларму инсан. Уларниң сиздәк вә биздәк сансизлиған алимлири лагерларда көздин ғайип болмақта. Әмди бизниң виҗданимизға соал қойидиған вақтимиз кәлди," дейилгән.

Мураҗиәтнамида уйғурларға хитап қилинип, уларниң һечқачан ялғуз әмәслики, өзлириниң һәрқачан уйғурлар үчүн көкрәк керип һәққанийәтни яқлайдиғанлиқи ‍алаһидә тәкитләнди. Улар йәнә хитай алимларғиму хитаб қилип, бу чақириқниң хитайларға қарши хитаб әмәсликини, әксичә инсанийәткә қарши қәбиһ зулумни иҗра қиливатқан хитай һөкүмитидәк бир залим һөкүмәтни әйибләшниң уларниңму мәҗбурийити икәнликини көрсәткән.

Мураҗиәтнаминиң ахирида илмий тәтқиқат орунлиридин башқа йәнә ахбарат, тәнтәрбийә, сода ширкәтлири һәмдә һөкүмәтләрниңму бу ишқа һәссә қошуши лазимлиқи тәкитләнди. Шуниңдәк "илмий җәмийәт бу хил қирғинчилиққа әмди сүкүт қилалмайду. Көрмәскә селипму олтуралмайду. Чүнки әмди һәркәткә өтидиған пәйт йетип кәлди," дәп көрситилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт