"Uyghur birliki" dunya ilim sahesige Uyghur qirghinchiliqi heqqide muraji'et yollidi

Muxbirimiz eziz
2021-03-04
Share

Xitay sirtidiki her sahe alimliri we tetqiqatchilirining xalis uyushushi bilen teshkillen'gen "Uyghur birliki" jem'iyiti 3-mart küni dunyaning herqaysi jayliridiki ilmiy tetqiqat bilen shughulliniwatqan barliq xadimlargha ochuq muraji'et yollap, ularni Uyghurlar duch kéliwatqan irqiy qirghinchiliqqa qarshi turushqa bir kishilik hessisini qoshushqa chaqirdi.

Ochuq muraji'etnamida xitay hökümitining Uyghurlargha yürgüziwatqan irqiy qirghinchiliqining janliq pakitliri chüshinishlik bayan qilinish bilen birge, xitay hökümiti élan qilghan türlük höjjetlerningmu nöwettiki qirghinchiliqni eks ‍ettüridighanliqi alahide tekitlendi. Shuningdek dunyaning herqaysi jayliridiki alimlarni xitay hökümitining bu xil wehshiyane qirghinchiliqini eyiblesh hemde Uyghurlarni hémaye qilishqa chaqirdi. Muraji'etnamida "Uyghurlarmu insan. Ularning sizdek we bizdek sansizlighan alimliri lagérlarda közdin ghayip bolmaqta. Emdi bizning wijdanimizgha so'al qoyidighan waqtimiz keldi," déyilgen.

Muraji'etnamida Uyghurlargha xitap qilinip, ularning héchqachan yalghuz emesliki, özlirining herqachan Uyghurlar üchün kökrek kérip heqqaniyetni yaqlaydighanliqi ‍alahide tekitlendi. Ular yene xitay alimlarghimu xitab qilip, bu chaqiriqning xitaylargha qarshi xitab emeslikini, eksiche insaniyetke qarshi qebih zulumni ijra qiliwatqan xitay hökümitidek bir zalim hökümetni eyibleshning ularningmu mejburiyiti ikenlikini körsetken.

Muraji'etnamining axirida ilmiy tetqiqat orunliridin bashqa yene axbarat, tenterbiye, soda shirketliri hemde hökümetlerningmu bu ishqa hesse qoshushi lazimliqi tekitlendi. Shuningdek "Ilmiy jem'iyet bu xil qirghinchiliqqa emdi süküt qilalmaydu. Körmeske sélipmu olturalmaydu. Chünki emdi herketke ötidighan peyt yétip keldi," dep körsitilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet