Хитай даирилири уйғур елида 5 милйон деқһан-чарвичини өй-земинлиридин көчурүп болған

Мухбиримиз ирадә
2020-11-26
Share

Хитай һөкүмитиниң уйғур елида тәхминән 5 милйон йәрлик деһқан-чарвичини өй-земинлиридин айрип көчүрүвәткәнлики мәлум болди.

Хитайниң "хәлқ гезити" 26-ноябир күни "шинҗаңда 5 милйон деһқан-чарвичи йәр тәврәшкә чидамлиқ өйләргә көчүп кирди" дәп хәвәр тарқатқан. Һалбуки, чәт әлләрдики көзәткүчиләр хитайниң уйғур елиниң җәнубидики уйғур йеза аһалилирини асаслиқ нишан қилип, "йәр тәврәшкә чидамлиқ өй қурулуши", "әмин өй қурулуши" дегән намларда йүргүзгән көчүрүш һәрикәтлириниң әмәлийәттә уйғурларниөй-земинлиридин айриш, тирикчилик мәнбәсини кесиш вә уларниң тупрақ билән болған беғини үзүш, шундақла уларни йиғип контрол қилишни мәқсәт қилған бир кәң көләмлик пилан икәнликини илгири сүрмәктә.

Дәрвәқ, хитайниң "хәлқ гезити" хәвәрдә йәркән наһийәсидә бир нәччә әвладтин бери чарвичилиқ билән шуғуллинип кәлгән иминҗан таш вә униң аилисиниң наһийәниң намратлиқтин қутулдуруш вә көчүрүлгәнләрни орунлаштуруш орни болған "мәңгүлүк әминлик" мәнасини билдүридиған "йоңән аһалиләр башқуруш комитети әнкаң 8-кәнти 1-гурупписиға көчүп кәлгәнликини, өткән үч йилда йәркән наһийәсидики 3 йеза-базардики 36 кәнттин кәлгән 1915 чарвичи аталмиш "йәр тәврәшкә чидамлиқ" өйләргә көчүрүлгәнликини хәвәр қилған.

Хәвәрдә йәнә мунулар баян қилинған: "шинҗаңниң җәнубидики үч вилайәт бир област шинҗаңдики йеза аһалилирини йөткәп олтурақлишиш түриниң муһим нуқтисидур. 2016-Йилдин башлап, шинҗаңниң җәнубидики үч вилайәт бир област җәмий 837 миң 800 йеза туралғу түрини йолға қойди, 2020-йили шинҗаңниң җәнубидики үч вилайәт бир пбластта 29 миң 341 өй селинидиған болуп, булар һәммиси тамамлинип болди. Пүтүн район җәмий 1 милйон 169 миң 800 йеза туралғу түрини йолға қойди, 5 милйонға йеқин деһқан вә чарвичи йәр тәврәшкә чидамлиқ өйгә көчүп кирди."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт