Уйғур дияридики кичик көмүр канлири тақилип, чоң ширкәтләр күчәйтилмәктә

Мухбиримиз үмидвар
2017-07-16
Share

Хитай уйғур дияридики кичик көмүр канлирини тақап, күчни чоң канларға мәркәзләштүрүшкә киришкән.

Уйғур аптоном районлуқ көмүр санаитини башқуруш идарисиниң ашкарилишичә, бу йил пүтүн уйғур районидики йиллиқ көмүр ишләпчиқириш миқдари 300 миң тоннидин төвән болған кичик көләмдики канлардин 109 ни тақашни қарар қилған.

"сина тори" ниң хәвиридә илгири сүрүлүшичә, хитай көмүр кан даирилири уйғур дияридики көмүрчилик санаитиниң тәрәққиятини тезлитиш, йәни көмүр ишләпчиқириш миқдарини техиму ашуруш мәқситидә ислаһат башлиған болуп, бир қанчә йил илгири уйғур дияридики 350 көмүр каниниң бир қисмини тақап, 2016-йили, 270 кә чүшүргән, буниң ичидики йиллиқ көмүр ишләпчиқириш миқдари 300 миң тоннидин төвән болған 200 көмүр канини қәдәмму-қәдәм тақаш чариси қоллинип, һазирғичә униң 105 ни иштин тохтатқан, бу йил болса йәнә 109ни тақашни қарар қилған.

Нөвәттә, уйғур дияридики асаслиқ көмүр ишләпчиқириш дөләтниң әң чоң көмүр санаәт ширкәтләр гуруһиниң қолида болуп, булар шәрқий җуңғар, қумул вә или көмүрчилик базилириға мәркәзләшкән.Бу йилниң биринчи йеримида уйғур дияридин 68 милйон тонна көмүр қезилған болуп, бу нисбәт йилдин йилға ашурулмақта. Шуниң билән бир вақитта хитай мәркизи һөкүмити "ғәрбниң көмүрлирини шәрққә тошуш" намидики лайиһә бойичә қумул, шәрқий җуңғар қатарлиқ көмүр базилиридики көмүр мәһсулатлирини ичкири хитай өлкилиригә тошуп, енергийә мәсилисини һәл қилиш нисбитини ашурмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт