Uyghur diyaridiki kichik kömür kanliri taqilip, chong shirketler kücheytilmekte

Muxbirimiz ümidwar
2017-07-16
Élxet
Pikir
Share
Print

Xitay Uyghur diyaridiki kichik kömür kanlirini taqap, küchni chong kanlargha merkezleshtürüshke kirishken.

Uyghur aptonom rayonluq kömür sana'itini bashqurush idarisining ashkarilishiche, bu yil pütün Uyghur rayonidiki yilliq kömür ishlepchiqirish miqdari 300 ming tonnidin töwen bolghan kichik kölemdiki kanlardin 109 ni taqashni qarar qilghan.

"Sina tori" ning xewiride ilgiri sürülüshiche, xitay kömür kan da'iriliri Uyghur diyaridiki kömürchilik sana'itining tereqqiyatini tézlitish, yeni kömür ishlepchiqirish miqdarini téximu ashurush meqsitide islahat bashlighan bolup, bir qanche yil ilgiri Uyghur diyaridiki 350 kömür kanining bir qismini taqap, 2016-yili, 270 ke chüshürgen, buning ichidiki yilliq kömür ishlepchiqirish miqdari 300 ming tonnidin töwen bolghan 200 kömür kanini qedemmu-qedem taqash charisi qollinip, hazirghiche uning 105 ni ishtin toxtatqan, bu yil bolsa yene 109ni taqashni qarar qilghan.

Nöwette, Uyghur diyaridiki asasliq kömür ishlepchiqirish döletning eng chong kömür sana'et shirketler guruhining qolida bolup, bular sherqiy jungghar, qumul we ili kömürchilik bazilirigha merkezleshken.Bu yilning birinchi yérimida Uyghur diyaridin 68 milyon tonna kömür qézilghan bolup, bu nisbet yildin yilgha ashurulmaqta. Shuning bilen bir waqitta xitay merkizi hökümiti "Gherbning kömürlirini sherqqe toshush" namidiki layihe boyiche qumul, sherqiy jungghar qatarliq kömür baziliridiki kömür mehsulatlirini ichkiri xitay ölkilirige toshup, énérgiye mesilisini hel qilish nisbitini ashurmaqta.

Toluq bet