Uyghur diyaridin xitay ölkilirige 208 milyard kilowat sa'ettin artuq yéngi énérgiye éléktir toki yollan'ghan

Xitayning “Gherbning tokini sherqqe yötkesh” qurulushi bashlan'ghandin buyan, Uyghur diyaridin xitay ölkilirige yollan'ghan yéngi énérgiye éléktir toki bu yil 11-ayghiche 208 milyard kilowat sa'ettin éship ketken. Xitay taratqulirining qeyt qilishiche, bu Uyghur élidin bu yil 11-ayghiche xitay ölkilirige yollan'ghan omumiy éléktir toki miqdarining üchtin bir qismini teshkil qilidiken. Nöwette, xitayning Uyghur diyarida ishlepchiqarghan toki “Gherbning tokini sherqqe yötkesh” qurulushining töt chong yuqiri bésimliq éléktir toki yollash liniyesi arqiliq xitayning sherqidiki soda-sana'et rayonlirigha yolliniwatqanliqi melum. Xitay merkizi téléwiziye istansisining bu yil 9-ayning axirlirida bergen bir xewiride, “Gherbning tokini sherqqe yötkesh” yolgha qoyulghan 2010-yildin buyan Uyghur rayonidin ichkiri xitaygha 4 liniye boyiche toshulghan omumiy tok miqdarining jem'iy 701 milyard 995 milyon kilowatqa yetkenliki bildürülgen.

  “Shinjang géziti” ning 28-dékabir bergen xewiride, bu yil 11 ayghiche xitay ölkilirige yollan'ghan yéngi énérgiye éléktir tokining 208 milyard 200 milyon kilowat sa'etke yetkenliki bildürülgen. “Gherbning tokini sherqqe yötkesh” qurulushi boyiche ishlepchiqiriliwatqan éléktir tokining mutleq köp qismining yenila kömür éléktir istansisilirida ishlepchiqirishi, bu orunlardin qoyup bérilgen zeherlik karbon we is-tütekning tesiri muhit qoghdighuchilirida jiddiy endishe peyda qilmaqta. “Shinxu'a agéntliqi” ning qeyt qilishiche, 208 milyard 200 milyon kilowat sa'et yéngi énérgiye éléktir toki 62 milyon 980 ming tonna ölchemlik kömürning az köydürülüshi, hawagha 170 milyon tonnidin artuq karbon töt oksidning az qoyup bérilishidin dérek béridiken.

Xitay hökümiti 2017-yildin bashlap shi jinpingning amérika hökümiti we bezi gherb parlaméntliri teripidin “Irqiy qirghinchiliq” dep eyiblen'gen “Yéngi dewridiki shinjangni bashqurush istratégiyesi” ni ijra qilip, milyonlighan Uyghur, qazaq we bashqa türkiy milletlerni lagér we türmilerge qamash, mejburiy emgekke sélish bilen bir waqitta “Gherbning tokini sherqqe yötkesh qurulushi” ning kölimini kéngeytken.