Amérikining térmo fishir shirkiti Uyghur élige gén téxnikisi sétishni toxtitidighanliqini jakarlidi

Muxbirimiz irade
2019-02-21
Élxet
Pikir
Share
Print

Amérikidiki térmo fishir bi'ologiyelik eswablar shirkiti Uyghur éli da'irilirige gén uchurlirini retlesh we saqlash üchün ishlitilidighan üskünilerni sétishni toxtitidighanliqini jakarlighan.

"Wal-strit zhurnili" ning xewer qilishiche, mezkur shirket bundaq bir qarar élishidiki sewebni öz üskünilirining rayonda éghir derijilik teqib sistémisini ishqa ashurushta qollinilishi bilen munasiwetliklikini bildürgen we "Bu bizning shirkitimizning xizmet exlaqi, qimmet qarishi we siyasetlirige uyghun emes," dep körsetken.

Amérikining massachustés shitatigha jaylashqan térmo fishér shirkiti DNA uchurlirini retlesh eswabi ishlepchiqiridighan bir shirket. Xelq'ara kishilik hoquqni közitish teshkilati 2017‏-yili 12‏-aydiki bir doklatida Uyghur aptonom rayonluq j x nazaritining Uyghurlarning gén uchurlirini yighip saqlash üchün ishletken üskünilirini yuqiriqi bu shérkettin sétiwalghanliqini ashkarilap, mezkur shérkettin köp qétim weqeni sürüshtürgen.

Amérika kéngesh palata ezasi marko rubiyomu mezkur shirketning bashliqi mark kaspérgha xet yézip, uning Uyghur aptonom rayonluq jama'et xewpsizliki bilen bolghan munasiwitini qattiq sürüshtürgen. Marko rubiyo we kiristofir simis qatarliq mejlis ezaliri yene amérika soda ministirigha mektup yézip, xitayning Uyghur rayonidiki basturush we teqiblesh heriketliride wasitilik halda shérik bolup qéliwatqan amérika shirketlirini derhal nazaret qilishini telep qilghan idi.

Térmo fishir shirkiti charshenbe küni élan qilghan bayanatida "Biz öz mehsulatlirimizni sétiwalghuchilarning qandaq meqsetler üchün ishletkenlikige diqqet qilimiz" dégen. Biraq shirketning bayanatida uning xitayning bashqa ölkiliri bilen dawamliq tijaret qilidighan yaki qilmaydighanliqi éniq tekitlenmigen.

Xitay hökümiti 2016‏-yili Uyghur aptonom rayoni miqyasida "Omumiy xelq salametlik tekshürüsh herikiti" nami astida bir heriket qozghap, Uyghurlarning qan ewrishkisi, barmaq izi, köz qarichuqi we awaz ewrishkiliri qatarliq muhim gén uchurlirini yighqan. Mezkur heriket eyni chaghda kishilik hoquq qoghdighuchilirida küchlük guman peyda qilghan idi.

Toluq bet