Xitay yél uniwérsitéti proféssori teminligen DNA sandinini Uyghurlarni teqibleshke ishletken

Muxbirimiz erkin
2019-02-22
Élxet
Pikir
Share
Print

Amérika yél uniwérsitéti tébbiy institutining proféssori, ataqliq DNA mutexessisi kénnis kédning xitay j x ministirliqigha qarashliq bir tetqiqat ornini DNA sandini bilen teminligenliki we bu DNA sandanining Uyghurlarni teqib qilishqa ishlitilgenliki ashkarilandi.

"Nyu-york waqti" gézitining 21‏-féwral élan qilghan xewiride ashkarilinishiche, nöwette xitay kénnis kéd we amérikidiki térmo-féshir bi'otéxnika shirkitining yardimide özining nahayiti mukemmel bir DNA sandanini qurup chiqqan.

Xewerde, mezkur DNA sandanining hökümetning Uyghurlarning kimlikini éniqlishi we nazaret qilishigha yardem qiliwatqanliqi bildürülgen. Xitay hökümiti 2016‏-yildin bashlap Uyghur aptonom rayoni miqyasida omumiy xelqning salametlik tekshürüsh herikitini qozghighan.

Eyni chaghda mejburiy élip bérilghan bu heriket kishilik hoquq teshkilatlirining gumanini qozghighan. Radiyomiz doxturxana we yerlik ahalilerni ziyaret qilish arqiliq salametlik tekshürüshning bir shekilwazliq ikenlikini bayqighan idi.

Kishilik hoquq közitish teshkilati bultur bu heriketning heqiqiy meqsiti Uyghurlarning DNA ewrishkisini yighish ikenliki, xitay amanliq organlirining bu arqiliq rayonda ghayet zor DNA sandani qurghanliqini élan qilghan idi.

"Nyu-york waqti" ning ilgiri sürüshiche, kénnis kéd özidiki DNA sandanlirini xitay terep bilen shérikleshken we shundaqla xitay terep uni 2143 din artuq Uyghurning DNA ewrishkisi bilen teminligen.


Xitay terep bu arqiliq Uyghurlar bilen bashqa milletlerni DNA arqiliq qandaq perqlendürüsh téxnikisigha érishken. "Nyu-york waqti" gézitining bayan qilishiche, kénnis kéd xitayning bu DNA ewrishkilirini qandaq yighqanliqi we némige ishlitidighanliqidin xewiri yoqluqini bildürgen.

U: "Men téxi bu ewrishkilerni ortaq tetqiqat üchün almashturuwatimiz, dep oylap qaptimen" dégen. "Nyu-york waqti" gézitining xewiride bayan qilinishiche, nöwette yél uniwérsitéti mezkur weqe üstidin tekshürüsh élip bérishqa bashlighan. Uniwérsitét tébbiy institutining mudiri robért alpérn "Nyu-york waqti" gézitige ewetken élxette, "Biz bu ishqa köngül bölüwatimiz" dégen.

Toluq bet