Uyghur élida "Omumiy xelq salametlik tekshürüsh qurulushi" namida élip bériliwatqan heriket jiddiy dawam qilmaqta

Muxbirimiz irade
2017-05-25
Share

Uyghur rayon da'iriliri bultur 9-aydin bashlap Uyghur aptonom rayonida omumyüzlük salametlik tekshürüsh qurulushini yolgha qoyup, xotenni buningdiki nuqtiliq sinaq merkizi qilghan idi.

Xoten gézitining bügün tarqatqan uchuridin qarighanda, yuqiridiki bu omumiy xelq salametlik tekshürüshi bashlinip, 23-mayghiche bolghan ariliqta xoten boyiche jem'iy 1 milyon 212 ming 695 neper kishi tekshürüshke élin'ghan bolup, bu xotendiki omumiy nopusning 5.50 Pirsentini igileydiken.

Xewerde yene, bu xizmetning toluq emeliylishishi üchün jaylardiki sehiye xadimlirining jiddiy xizmet qiliwatqanliqi bayan qilin'ghan.

Mezkur "Omumiy xelq salametlik tekshürüsh qurulushi" gha aptonom rayon maliyisidin 180 milyon som yardem meblighi ajritilghan bolup, buning da'irisi rayondiki pütün sheher, yéza ahalilirini omumyüzlük qaplaydiken. Uyghur élida, bolupmu Uyghurlargha omumyüzlük halda keng da'iride, mejburiyet süpitide élip bériliwatqan bu salametlik tekshürüsh qurulushining meqsiti chet'ellerdiki közetküchiler arisida guman qozghighan idi.

Yéqinda kishilik hoquqni közitish teshkilati xitay hökümitining hazir Uyghurlarni we köchme nopuslarni asas qilghan halda alahazel 40 milyon kishining DNA uchurlirini ambarlashturup bolghanliqini bildürgen we Uyghurlarning raziliqi we toluq xewiri bolmay turup DNA uchurini yighishning xelq'ara qanunlargha xilapliqini ipade qilghan. Aldinqi küni yene, "Tebi'et" zhurnili mexsus halda Uyghur éli da'irilirining DNA uchurlirini yighish ehwali we yéqinda xelq'araliq shirketlerdin sétiwalghan DNA uchurlirini bir terep qilish üskünilirige a'it uchurlargha asasen bir tekshürüsh maqalisi élan qildi. Maqalide ziyaret qilin'ghan mutexessisler xitay hökümitining zor DNA ambiri berpa qiliwatqanliqini we bu uchurlarni "Siyasiy muddi'aliri" üchün ishlitish éhtimalliqining intayin yuqiriliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.