Xitay da'iriliri Uyghur diyaridiki "Omumiy xelq salametlik tekshürüshi" ning meqsitige da'ir gumanlargha inkas qayturdi

Muxbirimiz erkin
2018-07-06
Élxet
Pikir
Share
Print

Uyghur aptonom rayonluq sehiye da'iriliri peyshenbe küni rayondiki "Omumiy xelq salametlik tekshürüshi" herikitining meqsitige da'ir gumanlargha inkas qayturup, buning rayondiki xelqqe payda élip kelgenlikini ilgiri sürgen.

Uyghur aptonom rayonining "Omumiy xelq salametlik tekshürüshi" herikiti 2016‏-yili séntebirde bashlinip, pütün Uyghurlar salametlik tekshürüshige mejburiy qatnashturulghan. Yerlik ahalilerning inkas qilishiche, salametlik tekshürüshige qatnashmighan Uyghurlar "Idiyeside mesile bar" dep agahlandurulghan. Salametlik tekshürüshide puqralarning qan ewrishkisi, barmaq izi, köz nuri we bashqa bi'ologiyelik uchurliri élinip, her bir kishige arxip turghuzulghan. Bu kishilik hoquq teshkilatlirining diqqitini qozghap, salametlik tekshürüsh herikitining meqsitige qarita so'al peyda qilghan. Kishilik hoquqni közitish teshkilati ötken yili xitayning "Omumiy xelq salametlik tekshürüshi" ni bahane qilip, emeliyette Uyghurlarning d n a ewrishkisini toplawatqanliqini ilgiri sürgen. Mezkur teshkilatning bildürüshiche, Uyghur aptonom rayonluq j x nazariti del shu mezgilde amérikidiki térmo-fishir, namliq bir shirkettin d n a retlesh eswabi sétiwélip, Uyghurlarning d n a arxipini turghuzushqa ishletken. Bu xelq'arada qattiq ghulghula qozghighan idi.

Shinxu'a agéntliqining peyshenbe küni xewer qilishiche, Uyghur aptonom rayonluq sehiye komitétining bir emeldari "Omumiy xelq salametlik tekshürüshi" herikitini aqlap, uning xelq ammisigha zor payda yetküzgenlikini ilgiri sürgen. Uning körsitishiche, bu heriket yéza-qshlaqlardiki bimarlarning waqtida we ünümlük dawalinishigha qolayliq yaritip bermektiken. U yene ötken yili yézilarda balilardiki qan raki we tughma yürek késilige oxshash éghir aghriqlarni dawalash programmisini yolgha qoylghanliqini bildürgen. Uyghur aptonom rayonining bu yilliq "Omumiy xelq salametlik tekshürüshi" ötken ayda bashlan'ghan idi.

Toluq bet