Xitay hökümiti Uyghur élidiki ahalilerning bi'ologiyelik uchurlirini yighish herikitini aqlidi

Muxbirimiz irade
2017-12-14
Élxet
Pikir
Share
Print

Xitay hökümiti aldinqi küni xitayning Uyghur élidiki ahalilerning DNA ewrishkisi qatarliq bi'ologiyelik uchurlirini yighiwatqanliqigha a'it doklat élan qilghan xelq'ara kishilik hoquqni közitish teshkilatini "Yalghanchiliq qildi," dep eyibligen.

Charshenbe küni, xelq'ara kishilik hoquqni közitish teshkilati bir parche doklat élan qilip, xitay hökümitining Uyghur élida milyonlighan xelqning DNA ewrishkisi qatarliq bi'ologiyelik uchurlirini yighiwatqanliqini, yene kélip buni "Omumiy xelq salametlik tekshürüshi" dégen saxta nam astida élip bériwatqanliqini qattiq tenqid qilghan idi. Mezkur doklat s n n téléwiziyesi, "Maliye waqti géziti" qatarliq muhim xelq'ara axbarat wasitiliriningmu diqqitini qozghighan.

Xitayning kompartiyesining awazi hésablinidighan "Xelq géziti" charshenbe küni kechqurun élan qilghan xewiride éytilishiche, xitay tashqi ishlar ministirliqining bayanatchisi lu kang shu künki axbarat élan qilish yighinida muxbirlarning bu heqte sorighan so'aligha "Bu teshkilat dawamliq xitaygha munasiwetlik weqeler üstide yalghan bayanlarni bérip kelmekte. Hökümitimiz bundaq sözlerge waqit israp qilishning hajiti yoq dep qaraydu," dep jawab bergen.

Halbuki, "Xelq géziti" öz xewiride Uyghur éli da'irilirining ahalilerning barmaq izi, köz qarichuqi, qan tipi we DNA ewrishkisini yighqanliqini we uni arxiplashturghanliqi ret qilmighan. Emma uning yéngi kimlik kartisi yasash we nopus istatéskisi üchün zörürlükini, hökümetning dölet bixeterliki üchün bundaq uchurlarni yighish hoquqi barliqini ilgiri sürgen. Diqqet qozghaydighini shuki, xewerde jéjyang uniwérsitétining turghunjan tursun isimlik bir neper Uyghur oqutquchisining sözi neqil élinip, "D n a ewrishkilirini yighishni kishilik hoquq depsendichiliki déyishning asasi yoq," déyilgen.

Xelq'ara kishilik hoquqni közitish teshkilati bolsa hökümetlerning öz meyliche kishilerning bi'ologiyelik uchurlirini yighish hoquqi bolmaydighanliqini, buning b d t da belgilen'gen bir qanche alaqidar qanunlargha xilapliqini eskertmekte. Ular, xitay hökümitining "Salametlik tekshürüshi" dégen saxta nam astida bu uchurlarni yighishini insan ghururi we jismaniy hoquqqa qilin'ghan éghir depsendichilik, dep körsetken.

Toluq bet