«Уйғур аптоном районлуқ әдәбият-сәнәт обзорчилири җәмийити» ниң қурулуши диққәт қозғиди

Мухбиримиз ирадә
2017-06-14
Елхәт
Пикир
Share
Принт

Тәңритағ ториниң хәвәр қилишичә, уйғур аптоном район даирилириниң қарариға асасән «уйғур аптоном районлуқ әдәбият-сәнәт обзорчилири җәмийити» қурулған вә бу җәмийәтниң тунҗи әзалар йиғини 13-июн күни үрүмчидә ечилған.

Йиғинда, уйғур районлуқ парткомниң даимий әзаси, тәшвиқат бөлүми башлиқи тийәнвен сөз қилип, әдәбият-сәнәтчиләрни уйғур аптоном райониниң һазирқи алаһидә вәзийитини чоңқур тонуп йетип, баш нишанни чөридәп, баш нишан үчүн хизмәт қилишни, марксизм идийиси тонушини өстүрүп, уйғур райониниң муқимлиқи вә әбәдий әминлики үчүн төһпә қошушқа чақирған.

Хәвәрдин мәлум болушичә мәзкур җәмийәт рәисликигә әдәбият-сәнәтчиләр бирләшмисиниң рәиси азад султан бекитилгән болуп мәзкур бирләшмә йеқинда аталмиш «үч хил күч» кә қарши күрәш қилидиғанлиқи һәққидә баянат елан қилған иди.

Чәтәлләрдики көзәткүчиләр хитай һөкүмитиниң юқиридики бу «әдәбият-сәнәтчиләр обзорчилири җәмийити» арқилиқ уйғур елидә елан қилинидиған барлиқ әдәбият-сәнәт әсәрлири, әдәбият-сәнәт программилирилириниң мәзмунини контрол қилишни мәқсәт қиливатқанлиқини билдүрмәктә.

Уйғур район даирилири йеқиндин буян уйғур елидә «индологийә саһәсидики күрәшни чоңқурлаштуруш» һәрикити қозғап, икки йүзлимичи идийә, икки йүзлимичи хаһиш вә икки йүзлимичи кадир, икки йүзлимичи дини зат дегәндәк исимлар билән кишиләрниң идийәсини синимақта. Йеқинда уйғур райониниң ахбарат-нәшрият вә тәшвиқат саһәсидики он миңлиған ишчи-хизмәтчиму қәсәмяд йиғиниға орунлаштурулуп, партийигә мутләқ садақәт көрситиш, икки йүзлимичи мәзмунларға қаттиқ зәрбә бериш тәләп қилинған иди.

Пикирләр (0)
Share
Толуқ бәт