“Uyghur aptonom rayonluq edebiyat-sen'et obzorchiliri jem'iyiti” ning qurulushi diqqet qozghidi

Tengritagh torining xewer qilishiche, Uyghur aptonom rayon da'irilirining qararigha asasen “Uyghur aptonom rayonluq edebiyat-sen'et obzorchiliri jem'iyiti” qurulghan we bu jem'iyetning tunji ezalar yighini 13-iyun küni ürümchide échilghan.

Yighinda, Uyghur rayonluq partkomning da'imiy ezasi, teshwiqat bölümi bashliqi tiyenwén söz qilip, edebiyat-sen'etchilerni Uyghur aptonom rayonining hazirqi alahide weziyitini chongqur tonup yétip, bash nishanni chöridep, bash nishan üchün xizmet qilishni, marksizm idiyisi tonushini östürüp, Uyghur rayonining muqimliqi we ebediy eminliki üchün töhpe qoshushqa chaqirghan.

Xewerdin melum bolushiche mezkur jem'iyet re'islikige edebiyat-sen'etchiler birleshmisining re'isi azad sultan békitilgen bolup mezkur birleshme yéqinda atalmish “Üch xil küch” ke qarshi küresh qilidighanliqi heqqide bayanat élan qilghan idi.

Chet'ellerdiki közetküchiler xitay hökümitining yuqiridiki bu “Edebiyat-sen'etchiler obzorchiliri jem'iyiti” arqiliq Uyghur élide élan qilinidighan barliq edebiyat-sen'et eserliri, edebiyat-sen'et programmilirilirining mezmunini kontrol qilishni meqset qiliwatqanliqini bildürmekte.

Uyghur rayon da'iriliri yéqindin buyan Uyghur élide “Indologiye sahesidiki küreshni chongqurlashturush” herikiti qozghap, ikki yüzlimichi idiye, ikki yüzlimichi xahish we ikki yüzlimichi kadir, ikki yüzlimichi dini zat dégendek isimlar bilen kishilerning idiyesini sinimaqta. Yéqinda Uyghur rayonining axbarat-neshriyat we teshwiqat sahesidiki on minglighan ishchi-xizmetchimu qesemyad yighinigha orunlashturulup, partiyige mutleq sadaqet körsitish, ikki yüzlimichi mezmunlargha qattiq zerbe bérish telep qilin'ghan idi.