Хитай даирилири уйғур елиниң әдлийә системисида кәң көләмлик алмаштуруш елип барди

Мухбиримиз әркин
2022-03-28
Share

Хитай һөкүмити уйғур аптоном райони вә униң райондики йерим ишләпчиқириш, йерим қораллиқ тәшкилати-биңтүәнни ‍өз ичигә алған уйғур елидики әдлийә системисида кәң көләмлик өзгәртиш елип берип, биңтуән вә йәрликтики һәр дәриҗилик тәптиш вә сот әмәлдарлиридин 140 дин артуқ кишини алмаштурған. Бу уйғур аптоном райони тарихида тунҗи қетим таратқуларға мәлум болған районниң һәр дәриҗилик сот вә тәптиш мәһкимилиридин бунчилик көп сотчи вә тәптишниң туюқсиз бирла вақитта алмаштурулушидур.

Хитай даирлириниң немә үчүн туюқсиз бунчилик көп тәптиш вә сотчини алмаштурушидики мәқсити мәлум әмәс. Хитай таратқулирида буниңға һечқандақ чүшүәнчә берилмигән. Лекин бәзи көзәткүчиләрниң ейтишичә, биңтуән вә районниң әдлийә системисидики бу өзгириш б д т кишилик һоқуқ алий комиссариниң бу йил 5-айда уйғур елида елип баридиған зияритигә қарида бир тәйярлиқ болуши мумкин икән. Хитай һөкүмити 2017-йили башланған чоң тутқунда районниң әдлийә системисиға нурғун сиясий кадирларни йөткәп, лагерға қамалған бигунаһ уйғурларни һечқандақ сот тәртипидин ‍өткүзмәй халиғанчә кәскән. Көзәткүчиләр, әдлийә системисидики кәң көләмлик алмаштурушниң юқириқи җинайәтни йошурушни мәқсәт қилған болуши мумкин, дәп қаримақта.

Хитайниң “биңтуән хәвәрлири” ториниң ашкарилишичә, бу қетимқи алмаштурушта уйғур аптоном районлуқ юқири сотниң муавин башлиқидин тартип юқири тәптиш мәһкимисиниң баш тәптишигичә, һөкүм чиқириш комитетиниң әзалиридин тартип, биңтуән сот вә тәптиш мәһкимисиниң муавин башлиқлириғичә, һәр қайси йәрлик оттура сот вә тәптиш мәһкимилириниң башлиқи, сотчиси, тәптиш әмәлдарлиридин тартип, һәр қайси биңтуән девизийәлиридики оттура сот вә тәптиш мәһкимилириниң сотчи вә тәптишлиригичә болған нурғун адәм алмаштурулған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт