Uyghur élide 11 ay ichide xewpsizlikke munasiwetlik 84 ming xizmet ornigha élan bérilgen

Muxbirimiz jüme
2017-08-12
Élxet
Pikir
Share
Print

Xewerlerge qarighanda, Uyghur élide ötken yili séntebirdin buyan xewpsizlikke munasiwetlik élan qilghan xizmet orni 84 mingdin éship ketken.

Xongkongda chiqidighan "Jenubiy xitay seher géziti" ning xewer qilishiche, bu sanliq melumatlar gérmaniyediki yawropa medeniyet we ilahiyetshunasliq uniwérsitéti tetqiqatchisi adriyan zénzning yéqinqi doklatidin neqil élin'ghan. 

Xewerge qarighanda, Uyghur élide 11 ay ichide élan qilin'ghan saqchigha munasiwetlik xizmet orni ötken 10 yil jeryanida pütkül Uyghur éli miqyasida élan qilin'ghan bixeterlik xadimlirining sanidin 50 pirsent köp iken. 

Xewerde mundaq körsitilgen: "Siyasiy sehnide barghanche kötürülüwatqan chén chu'en'go shinjangda hakimiyet béshigha chiqqini bir yil bolay dep qaldi, shuninggha egiship, saqchi xizmet orunliridimu partlash xaraktérlik köpiyish körüldi."

Xewerge qarighanda, adriyan zénz doklatida Uyghur éli da'irilining 2016-yilining axirqi 4 éyida jem'iy 30 ming xewpsizlik xadimi qobul qilish élani chiqarghanliqi, emma 2017-yili saqchi qobul qilish élanliri jiddiy rewishte köpiyip, peqet 7 ay ichidila yéngidin 53 ming xewpsizlik xadimi qobul qilish élani chiqirilghanliqini körsetken.

Xewerde neqil élip körsitishiche, Uyghur élide hessilep köpeytiliwatqan xewpsizlik xadimliri heqqide toxtalghan zénz: "Bu jiddiy köpiyish chén chu'en'go bilen bille keldi. Bu, öz nöwitide yene bir saqchi döliti berpa qilishning shertlirini hazirlash bilenmu biwasite munasiwetlik" dégen.

Chén chu'en'go ötken yilining axiri Uyghur élige bash sékrétar qilip yötkelgendin buyan, Uyghur élide ezeldin qattiq bixeterlik tedbirlirining yene kücheytilgenliki, bezi sheherlerde her ming métirda birdin saqchi ponkitliri qurulghanliqi xewer qilin'ghan idi.

Toluq bet