Уйғур елидики яйлақларниң 80 пирсәнти вәйранчилиққа учриған

Мухбиримиз җүмә
2018-02-10
Share

Хитай ахбарати уйғур елидики яйлақларниң 80 пирсәнттин көпрәкиниң вәйран қилинғанлиқини билдүргән болсиму, әмма буниңдики сәвәбләрни толуқ чүшәндүрмигән.

Шинхуа ахбаратиниң хәвәр қилишичә, уйғур елидә һазир 57 милйон гектар яйлақ бар болуп, буларниң 65 пирсәнти чарва беқишқа ишлитилидикән. 

Хәвәргә қариғанда бу яйлақларниң көп қисми һәрхил дәриҗидики вәйранчилиққа учриған.

Хәвәрдә мундақ дейилгән: "килимат өзгириши вә нормидин артуқ чарва беқиш сәвәбидин 80 пирсәнттин артуқ яйлақ бузғунчилиққа учриди."

Һалбуки хәвәрдә, уйғур елидә барғанчә кеңийиватқан шәһәрлишиш һадисиси, чарвичилиқ районлирида пилансиз ечиливатқан саяһәт районлири вә кан-карханиларниң яйлақларниң вәйран қилинишини күчәйтиватқан муһим амилларниң бири икәнликини көрситилмигән.

Радиомиз илгири игилигән бир қисим учурларда, өткән әсирниң ахирлиридин буян шәһәр көлиминиң шиддәт билән зорийиши, йеңи тәрәққият районлириниң кәйни-кәйнидин ечилиши, кан байлиқлириниң тез сүрәттә қезилиши сәвәблик қумул вилайитиниң чарвичилиқ районлириға болған хирис һәссиләп күчәйгәнлики ашкариланған. 

Униңдин башқа үрүмчи булақтағдики қазақ чарвичиларниң яйлақлири 2015-йили яйлақни әслигә кәлтүрүш намида тартивелинип, орниға дачилар селинған.
Нәтиҗидә 100 дин артуқ чарвичи яшаш йолидин айрилип қалған. Бу хил һадисиләрниң ғулҗа вә чарвичилиқ игилики бар башқа вилайәтләрниң һәммисидә ортақ көрүлгәнлики илгири сүрүлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт