Xitaydiki hökümet testiqi bilen hejge baridighanlar ichide Uyghur hej tawap qilghuchilarning nisbiti diqqet qozghimaqta

Xitay döletlik diniy ishlar idarisining ashkarilishiche, 20-awghust, yeni ötken shenbe küni xitaydiki hökümet testiqi bilen se'udi erebistan'gha yolgha chiqqan 11 ming hej tawap qilghuchi shu küni medine shehirige yétip barghan.

Igilinishiche, bu yil xitaydin hökümet testiqi bilen hejge baridighan musulmanlarning sani 14 ming 500 kishige yétidiken.

B b s ning ilgiri sürüshiche, 20-awghust béyjing xelq'ara ayrodromidin 37 dane chong tiptiki ayropilan bilen yolgha chiqqan 11 ming hej tawap qilghuchi xitayning ningshya, gensu, chingxey, xénen, xébéy qatarliq ölkiliridin teshkillen'gen musulmanlar iken.

Halbuki, mezkur 11 ming hej tawap qilghuchi ichide Uyghur, qazaq qatarliq Uyghur élidiki musulmanlar tilgha élinmighan. Peqetla ularning xitay ölkiliridin teshkillen'gen musulmanlar ikenliki ilgiri sürülgen.

Közetküchiler bilen Uyghur weziyet analizchiliri qalghan 3 yérim ming hej tawap qilghuchining Uyghur élidin hökümet testiqi bilen hejge baridighan musulmanlar ikenlikini texmin qilmaqta. Ular, egerde bu nisbet jezimleshtürülse, xitaydiki musulmanlar sanining 51 pirsentini igileydighan Uyghur élidin aran 3 mingdin artuq kishi hökümet testiqi bilen hejge baralaydiken. Emma xitay ölkiliridiki tunggan musulmanliridin hejge baridighanlar 11 kishige yétidiken.