Uyghur élida yene kan weqesi yüz bérip 10 adem öldi

Muxbirimiz méhriban
2014-12-02
Élxet
Pikir
Share
Print


Ötken heptining axiri Uyghur élida yüz bergen kömürkan gömürülüsh weqeside 10 ademning ölgenliki melum boldi.

Xitayning shinjang xewerler torining xewiride 2 - dékabir küni Uyghur aptonom rayonluq kömürkan idarisining qumul nenxu 7 - nomurluq kömür kéni we bingtüen'ge qarashliq tengritagh 106 - kömür kénigha kömür qézishni toxtitish buyruqi chüshürgenlikini élan qildi. Xewerdin melum bolushiche, bu ikki kanda ilgiri köp qétim kömür kan gümürülüsh weqesi we gaz partlash weqeliri yüz bergen. Xewerdin ashkarilinishiche, axiriqi qétimliq kan weqesi ötken hepte yüz bérip weqede köp adem yarilinip, 10 adem ölgen.

Yéqinqi birqanche yildin buyan Uyghur élida xitay shirketlirining kan igilesh heriketliri barghanche köpeygen bolup, 2010 - yili échilghan shinjang xizmet yighinidin kéyin yéngidin échilghan kömür kanliri asasen xitay shirketlirining igidarchiliqida bolup, bu kömür kanlirining munbet térilghu yerler we charwichiliq meydanlirida échilishi, Uyghur déhqanliri we qazaq charwichilirini yéridin ayrilish qismitige duchar qilipla qalmastin, kömür kandin chiqqan kömür tozanliri we suning bulghinishi bu jaylardiki otlaq we miwilik derexlerni weyran qilip, yerlik ahalilerde her xil nepes yallughi késelliklirini köpeytken. Bu sewebtin yéqinqi yillarda Uyghur qatarliq yerlik milletlerning naraziliq erzi sunush we qarshiliq heriketlirimu kücheygen idi.

Toluq bet