Елий визәл фонди “уйғур ирқий қирғинчилиқини тохтитиш” муһакимә йиғини ечишни пиланлиған

Вашингтондин мухбиримиз җәвлан тәйярлиди
2024.04.03

“йәһудий чоң қирғинчилиқи” дин аман қалған язғучи елий визәл (Elie Wiesel) намида қурулған “елий визәл фонди” хитайниң қәбиһ бастурушиға учраватқан уйғурларға қандақ ярдәм қилиш тоғрисида динлар ара муһакимә йиғини ечишни пиланлиған.

“йәһудий хәвәрлири” (Jewish News) гезити 2-апрел күни бәргән бу хәвәрдә қәйт қилинишичә, елий визәлниң оғли елиша (Elisha) башқуруватқан “елий визәл фонди” дуня уйғур қурултийи вә уйғур кишилик һоқуқ қурулуши билән бирликтә 4-айниң 17-, 18-күнлири ню-йорк шәһиридә “уйғур ирқий қирғинчилиқини тохтитиш” темисида муһакимә йиғини өткүзидикән.

Бу йиғинға америка ташқи ишлар министирлиқи ирқий қирғинчилиқ мәсилиси алаһидә әлчиси еллен гермайн (Ellen Germain) , шундақла нопузлуқ ислам өлималири вә йәһудий рабийлиридин башқа йәнә, манхаттин институти ирқий қирғинчилиқ вә динлар ара тәтқиқат мәркизи, америка йәһудий чоң қирғинчилиқи музейи қатарлиқ орунларму қатнишидикән.

Йиғин башлиниш алдида, “хитай маллири алаһидә көргәзмиси” ечилидикән, буниңда истемалчилар яхши көридиған малларниң әслидә қул қилинған уйғурларниң қан-тәри бәдилигә кәлгән мәҗбурий әмгәк мәһсулатлири икәнлики көрситилидикән.

Мунасивәтлик учурларға қариғанда, елий визәл (2016—1928) өткән әсирдә 2-дуня уруши мәзгилидә йүз бәргән йәһудий чоң қирғинчилиқидин аман қалған язғучи болуп, буниңға мунасивәтлик әслимиләрни йезип даң қазанған; уруш җинайити вә ирқий қирғинчилиққа қарши дуняви тәсир пәйда қилишта төһпә қошқанлиқи үчүн 1986-йил нобел тинчлиқ мукапатиға еришкән. Униң намида қурулған “ели визәл фонди” ирқий қирғинчилиқ җинайитигә зәрбә бериш вә кишилик һоқуқни қоғдашта актип паалийәт көрситип кәлгән. Мәзкур фондниң күч чиқириши билән америкада 2019-йил қанунға айланған “елий визәл етник қирғинчилиқ вә қәбиһ җинайәтләрниң алдини елиш қанун лайиһәси” америкада ирқий қирғинчилиққа қарши сиясәт түзүштә муһим мәнбәгә айланған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.