Éliy wizel fondi “Uyghur irqiy qirghinchiliqini toxtitish” muhakime yighini échishni pilanlighan

Washin'gtondin muxbirimiz jewlan teyyarlidi
2024.04.03

“Yehudiy chong qirghinchiliqi” din aman qalghan yazghuchi éliy wizel (Elie Wiesel) namida qurulghan “Éliy wizel fondi” xitayning qebih basturushigha uchrawatqan Uyghurlargha qandaq yardem qilish toghrisida dinlar ara muhakime yighini échishni pilanlighan.

“Yehudiy xewerliri” (Jewish News) géziti 2-aprél küni bergen bu xewerde qeyt qilinishiche, éliy wizelning oghli élisha (Elisha) bashquruwatqan “Éliy wizel fondi” dunya Uyghur qurultiyi we Uyghur kishilik hoquq qurulushi bilen birlikte 4-ayning 17-, 18-künliri nyu-york shehiride “Uyghur irqiy qirghinchiliqini toxtitish” témisida muhakime yighini ötküzidiken.

Bu yighin'gha amérika tashqi ishlar ministirliqi irqiy qirghinchiliq mesilisi alahide elchisi éllén gérmayn (Ellen Germain) , shundaqla nopuzluq islam ölimaliri we yehudiy rabiyliridin bashqa yene, manxattin instituti irqiy qirghinchiliq we dinlar ara tetqiqat merkizi, amérika yehudiy chong qirghinchiliqi muzéyi qatarliq orunlarmu qatnishidiken.

Yighin bashlinish aldida, “Xitay malliri alahide körgezmisi” échilidiken, buningda istémalchilar yaxshi köridighan mallarning eslide qul qilin'ghan Uyghurlarning qan-teri bedilige kelgen mejburiy emgek mehsulatliri ikenliki körsitilidiken.

Munasiwetlik uchurlargha qarighanda, éliy wizel (2016—1928) ötken esirde 2-dunya urushi mezgilide yüz bergen yehudiy chong qirghinchiliqidin aman qalghan yazghuchi bolup, buninggha munasiwetlik eslimilerni yézip dang qazan'ghan؛ urush jinayiti we irqiy qirghinchiliqqa qarshi dunyawi tesir peyda qilishta töhpe qoshqanliqi üchün 1986-yil nobél tinchliq mukapatigha érishken. Uning namida qurulghan “Éli wizel fondi” irqiy qirghinchiliq jinayitige zerbe bérish we kishilik hoquqni qoghdashta aktip pa'aliyet körsitip kelgen. Mezkur fondning küch chiqirishi bilen amérikada 2019-yil qanun'gha aylan'ghan “Éliy wizel étnik qirghinchiliq we qebih jinayetlerning aldini élish qanun layihesi” amérikada irqiy qirghinchiliqqa qarshi siyaset tüzüshte muhim menbege aylan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.