Uyghur rayoni da'iriliri ali mektep püttürgen ishsiz yashlarni terbiyilesh pilanini dawamlashturmaqta

Muxbirimiz ümidwar
2016-07-10
Share


Uyghur aptonom rayoni da'iriliri 2016 - yilidin 2020 - yilighiche bolghan kelgüsi töt yil ichide 20 ming aliy mektep püttürüp ishsiz qalghan yashni mexsus terbiyilep ishqa orunlashturush pilanini élan qildi.

Melum bolushiche, 2009 - yili, 5 - iyul ürümchi weqesidin kéyin échilghan xitay merkizi hökümitining mexsus "Shinjang xizmet yighini"da Uyghur aptonom rayonidiki ishsiz yashlarni, bolupmu ali mektep püttürgendin kéyin ishsiz qalghan Uyghur we bashqa millet yashlirini ishqa orunlashturidighanliqi qarar qilin'ghandin kéyin mezkur sahe boyiche bir qisim layihiler élip bérilghan idi.

Xitay hökümet terep ene shu qarar boyiche 2011 - yilidin 2015 - yilighiche 28 mingdin artuq aliy mektep püttürüp ishsiz qalghan yashni ichkiri xitaydiki 19 sheherge we dölet tarmaqlirigha qaraydighan 188 aliy mektepte qayta terbiyiligenlikini bildürdi.

Tengri tagh torining xewer qilishiche, mezkur terbiyedin ötkenlerning ichide 26 mingdin artuqining ishqa orunlashturulghanliqi éytilghan bolsimu, emma ularning millet terkib nisbiti heqqide héch néme déyilmigen.

Uyghur aptonom rayoni da'iriliri yéqinda ikkinchi türkümde yene 20 ming aliy mektep püttürgen ishsiz yashni mexsus terbiyilesh pilanini élan qilghan bolup؛ bularning 8 ming nepirini ichkiri xitay sheherlirige ewetish we qalghan 12 mingni Uyghur rayonining özide terbiyilesh qarar qilin'ghan iken.

Uyghur aptonom rayon da'iriliri bu qétim terbiyilinidighan ikki tümen aliy mektep püttürgen ishsiz yashning asasliqi Uyghur rayonining jenubidiki üch wilayet we bir oblastni hem bu yerdiki xitay emes milletlerni nuqta qilidighanliqini élan qilghan.

Uyghur közetküchilerning inkas qilishiche, her xil aliy mektep we ottura derijilik téxnikom we bashqilarni püttürüp ishsiz qalghan Uyghur yashliri yillardin buyan izchil köpiyiwatqan bolup, buninggha aliy we ottura derijilik ma'arip terbiyisi körmigen ishsiz yashlarni qoshsa ularning sani téximu ashidiken. Da'iriler yashlardiki ishsizliq mesilisi ijtima'iy muqimsizliqning asasliq menbeliridin biri dep hésablimaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet