Uyghur élide 6 neper kadir "Qara küchler" ge chétilip jazalan'ghan

Muxbirimiz irade
2019-05-23
Élxet
Pikir
Share
Print

Xitay hökümiti yéqindin buyan Uyghur élide atalmish "Qara küchlerge zerbe bérish" toghrisida uqturush chiqirip, keng xelq ammisini "Qara küchler" ni pash qilishqa seperwer qilmaqta.

23-May künidiki "Tengritagh tori" ning xewirige qarighanda, shinjang Uyghur aptonom rayonluq intizam tekshürüsh komitéti bilen réwiziye komitéti jaylardin 6 neper kadirni atalmish "Qara küchlerge" chétip jazalighan. Ular ili qazaq aptonom oblastliq ma'arip idarisining mu'awin idare bashliqi yalqun osman, jing nahiye mandan yéza charwichiliq tereqqiyat rayonining yachéyka sékrétari kadirqan qabil, awat nahiyelik jama'et xewpsizliki idarisi amanliq bashqurush chong etritining siyasiy yétekchisi nurmemet mamut, pichan nahiyelik xelq ishliri idarisining mu'awin idare bashliqi tahir memet qatarliqlarni öz ichige alidiken.

Da'iriler yuqiriqi bu kadirlarni "Hoquqidin paydilinip, qara we rezil küchler shaykilirining jinayi heriket bilen shughullinishini qoghdighan, ularning herikitini qanat astigha alghan, hetta déloni yoq qilip, qara, rezil küchlerning zerbidin qéchishigha yardem bergen" dep eyibligen.

Xitay hökümiti ilgiri "Qara küchler" ning kimlikige a'it uqturushlirida qara küchlerni "Milliy bölgünchilik, diniy esebiylik we térrorluq bilen shughullinidighan teshkilatlar we jama'etler, yurtdashliq, tughqanchiliq, dindashliq rishtisi boyiche guruh uyushturghanlar, bölgünchi, diniy esebiy küchlerni qanat astigha alghan 'ikki yüzlimichi kadirlar', chet'eldiki 'qara guruh we rezil küchler' bilen alaqisi barlar. . ." dep sherhligen idi.

Chet'ellerdiki Uyghur közetküchiler xitayning Uyghur diyaridiki "Qara küchke zerbe bérish" herikitining omumiy nishanining yenila Uyghurlarni asas qilghan yerlik milletlerge zerbe bérish boluwatqanliqini ilgiri sürmekte. Yuqiriqi "Qara küch" lerge "Muhapizet künlüki bolush" bilen eyiblinip jazalan'ghan 6 emeldarning 3 nepirining Uyghur we bir nepirining qazaq millitidin bolushimu buning ipadisi iken.

Toluq bet