Хитай һөкүмити лопнор наһийәсидики 3 нәпәр уйғур кадирни өз ичигә җәмий 6 нәпәр кадирға чарә көргән

Мухбиримиз ирадә
2021-07-08
Share

Хитайчә "шинҗаң хәвәрләр тори" ниң хәвиридин мәлум болушичә, йеқинда лопнор наһийәлик интизам тәкшүрүш комитети йәнә 6 нәпәр кадир үстидин "бәлгилимә вә интизамға хилаплиқ қилған" дәп уқтуруш чиқарған болуп, уларниң 3 нәпири уйғур икән.

Улар лопнор наһийә тарим базириниң сабиқ муавин базар башлиқи мәһмут реһим, гүлбағ йезилиқ мейипләр бирләшмисиниң кадири рәйһангүл мөйдин, қарчуға йезилиқ су башқуруш понкитиниң кадири һошур мәмәт қатарлиқлар икән.

Хәвәрдә мундақ дейилгән: "юқириқи алтә типик делода бир қисим кадирларниң интизам еңи аҗиз болуп, улар интизамға хилаплиқ қилған; бәзи йетәкчи кадирлар шәхсий мәнпәәтигә чоғ тартқан. Асасий қатламдики бир қисим адәттики кадирларниң мулазимәт туйғуси йоқ. Улар вәзиписини әстайидил ада қилмиған, партийә вә амма арисида пайдисиз тәсирләрни пәйда қилған".

Хитай даирилири йеқиндин буян уйғур елида "мәркәзниң 8 түрлүк бәлгилисимигә хилаплиқ қилиш" дегән нам билән асасий қатламлардики кадир-әмәлдарларни җазалаш һәрикити қозғиған. Чәт әлләрдики көзәтчиләр хитай һөкүмити һазир хәлқарада уйғурларға қаритиватқан ирқий қирғинчилиқи түпәйлидин қаттиқ тәнқид вә бесимға дуч кәлгәнликтин, райондики вәзийәтни йәниму чиңитип, кадир-әмәлдарларниң йүрикини қисишни мәқсәт қиливатқанлиқини мөлчәрлимәктә.

Уйғур елидики сиясий муһитниң үзлүксиз чиңийиватқанлиқи лопнор наһийәлик интизам тәкшүрүш комитети тәрипидин чиқирилған уқтуруштиму өз ипадисини тапқан. Униңда һәр дәриҗилик кадирларға төвәндикидәк агаһландуруш берилгән:

"һәр дәриҗилик партийә әзалири вә рәһбирий кадирлар, болупму юқири дәриҗилик рәһбәрләр вә әтрәт әзалири өзлириниң идийиви тонушини күчәйтип, һәмишә өзини чениқтуруши керәк. Һарғинлиқтин ибарәт универсал кесәлликиниң алдини қәтий елип, ашкариланған система йочуқлири вә назарәт қилип башқурушниң өлүк нуқтилириға қарита интизам тәкшүрүш вә назарәт қилиш тәклиплирини тездин күчәйтишимиз, система механизиминиң яхшилинишини илгири сүрүшимиз керәк."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт