Xitay hökümiti lopnor nahiyesidiki 3 neper Uyghur kadirni öz ichige jem'iy 6 neper kadirgha chare körgen

Xitayche “Shinjang xewerler tori” ning xewiridin melum bolushiche, yéqinda lopnor nahiyelik intizam tekshürüsh komitéti yene 6 neper kadir üstidin “Belgilime we intizamgha xilapliq qilghan” dep uqturush chiqarghan bolup, ularning 3 nepiri Uyghur iken.

Ular lopnor nahiye tarim bazirining sabiq mu'awin bazar bashliqi mehmut réhim, gülbagh yéziliq méyipler birleshmisining kadiri reyhan'gül möydin, qarchugha yéziliq su bashqurush ponkitining kadiri hoshur memet qatarliqlar iken.

Xewerde mundaq déyilgen: “Yuqiriqi alte tipik déloda bir qisim kadirlarning intizam éngi ajiz bolup, ular intizamgha xilapliq qilghan؛ bezi yétekchi kadirlar shexsiy menpe'etige chogh tartqan. Asasiy qatlamdiki bir qisim adettiki kadirlarning mulazimet tuyghusi yoq. Ular wezipisini estayidil ada qilmighan, partiye we amma arisida paydisiz tesirlerni peyda qilghan”.

Xitay da'iriliri yéqindin buyan Uyghur élida “Merkezning 8 türlük belgilisimige xilapliq qilish” dégen nam bilen asasiy qatlamlardiki kadir-emeldarlarni jazalash herikiti qozghighan. Chet ellerdiki közetchiler xitay hökümiti hazir xelq'arada Uyghurlargha qaritiwatqan irqiy qirghinchiliqi tüpeylidin qattiq tenqid we bésimgha duch kelgenliktin, rayondiki weziyetni yenimu chingitip, kadir-emeldarlarning yürikini qisishni meqset qiliwatqanliqini mölcherlimekte.

Uyghur élidiki siyasiy muhitning üzlüksiz chingiyiwatqanliqi lopnor nahiyelik intizam tekshürüsh komitéti teripidin chiqirilghan uqturushtimu öz ipadisini tapqan. Uningda her derijilik kadirlargha töwendikidek agahlandurush bérilgen:

“Her derijilik partiye ezaliri we rehbiriy kadirlar, bolupmu yuqiri derijilik rehberler we etret ezaliri özlirining idiyiwi tonushini kücheytip, hemishe özini chéniqturushi kérek. Harghinliqtin ibaret uniwérsal késellikining aldini qet'iy élip, ashkarilan'ghan sistéma yochuqliri we nazaret qilip bashqurushning ölük nuqtilirigha qarita intizam tekshürüsh we nazaret qilish tekliplirini tézdin kücheytishimiz, sistéma méxanizimining yaxshilinishini ilgiri sürüshimiz kérek.”