Уйғур аптоном районлуқ деһқанчилиқ назаритиниң назири турсунҗан әли “тәкшүрүш” кә елип кетилгән

Мухбиримиз әзиз
2021-11-24
Share

Хитай мәркизий ревизийә комитетиниң тор бетидә 22-ноябир елан қилинған хәвәрдә ейтилишичә, уйғур аптоном районлуқ деһқанчилиқ вә йеза назарити партгурупписиниң муавин секретари, назир турсунҗан әли “интизамға вә қанунға еғир дәриҗидә хилаплиқ қилиш” билән әйиблинип, уйғур аптоном районлуқ ревизийә назаритиниң тәкшүришигә елип кетилгән.

Хәвәрдә ейтилишичә, турсунҗан әли 1968-йили туғулған болуп, илгири қәшқәр вә ғулҗа тәвәсидә түрлүк рәһбирий хизмәтләрни өтигән. Кейинчә уйғур аптоном районлуқ һөкүмәтниң баш катипи, уйғур аптоном районлуқ су ишлири назаритиниң муавин назири, 2020-йили июндин башлап деһқанчилиқ вә йеза назаритиниң назири болуп ишлигән икән.

Мәлум болушичә, хитай һөкүмитиниң өткән бирнәччә йилдин буян давам қиливатқан сиясий бастурушлирида йоқитиливатқан уйғур рәһбирий кадирларниң һәммиси дегүдәк дәсләп мушу хилдики “интизамға вә қанунға хилаплиқ қилиш” билән әйибләнгән, андин өлүм җазаси яки муддәтлик қамаққа һөкүм қилинған иди. Америкадики хитай анализчи чен покоң сабиқ рәис нур бәкриниң қолға елиниш мунасивити билән радийомиз зияритини қобул қилғанда: “хитай һөкүмити еһтияҗи қалмиғанда уйғур рәһбирий кадирларни ашу йосунда бир-бирләп йоқитиду,” дегән иди.

Йеқинда хитай таратқулири “уйғур аптоном районлуқ содийәләрни җазалаш комитети” қурулғанлиқини елан қилған болуп, йоқури сотниң үстидә туридиған бу комитет, сотчи вә сот системисидики хадимларни назарәт қилиш, “сот җәрянида юмшаққоллуқ қилған, қаттиқ позитсийәдә болмиған” сот хадимлирини җазалашни мәқсәт қилидикән. Уйғур аптоном районлуқ деһқанчилиқ назаритиниң назири турсунҗан әлиниң “тәкшүрүш” кә елип кетилиши, уйғур районида уйғур рәһбирий кадирларни тазилаш һәрикитиниң изчил давамлишиватқанлиқидин дерәк беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт