Uyghur aptonom rayonluq déhqanchiliq nazaritining naziri tursunjan eli "Tekshürüsh" ke élip kétilgen

Muxbirimiz eziz
2021-11-24
Share

Xitay merkiziy réwiziye komitétining tor bétide 22-noyabir élan qilin'ghan xewerde éytilishiche, Uyghur aptonom rayonluq déhqanchiliq we yéza nazariti partguruppisining mu'awin sékrétari, nazir tursunjan eli "Intizamgha we qanun'gha éghir derijide xilapliq qilish" bilen eyiblinip, Uyghur aptonom rayonluq réwiziye nazaritining tekshürishige élip kétilgen.

Xewerde éytilishiche, tursunjan eli 1968-yili tughulghan bolup, ilgiri qeshqer we ghulja teweside türlük rehbiriy xizmetlerni ötigen. Kéyinche Uyghur aptonom rayonluq hökümetning bash katipi, Uyghur aptonom rayonluq su ishliri nazaritining mu'awin naziri, 2020-yili iyundin bashlap déhqanchiliq we yéza nazaritining naziri bolup ishligen iken.

Melum bolushiche, xitay hökümitining ötken birnechche yildin buyan dawam qiliwatqan siyasiy basturushlirida yoqitiliwatqan Uyghur rehbiriy kadirlarning hemmisi dégüdek deslep mushu xildiki "Intizamgha we qanun'gha xilapliq qilish" bilen eyiblen'gen, andin ölüm jazasi yaki muddetlik qamaqqa höküm qilin'ghan idi. Amérikadiki xitay analizchi chén pokong sabiq re'is nur bekrining qolgha élinish munasiwiti bilen radiyomiz ziyaritini qobul qilghanda: "Xitay hökümiti éhtiyaji qalmighanda Uyghur rehbiriy kadirlarni ashu yosunda bir-birlep yoqitidu," dégen idi.

Yéqinda xitay taratquliri "Uyghur aptonom rayonluq sodiyelerni jazalash komitéti" qurulghanliqini élan qilghan bolup, yoquri sotning üstide turidighan bu komitét, sotchi we sot sistémisidiki xadimlarni nazaret qilish, "Sot jeryanida yumshaqqolluq qilghan, qattiq pozitsiyede bolmighan" sot xadimlirini jazalashni meqset qilidiken. Uyghur aptonom rayonluq déhqanchiliq nazaritining naziri tursunjan elining "Tekshürüsh" ke élip kétilishi, Uyghur rayonida Uyghur rehbiriy kadirlarni tazilash herikitining izchil dawamlishiwatqanliqidin dérek béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet