Shi jinping merkizi partiye mektipide oquwatqan Uyghur kadirliridin küchlük xitaylishish éngi turghuzushni telep qilghan

Xitay kompartiyesining bash sékrétari shi jinping Uyghur aptonom rayonining béyjingdiki merkizi partiye mektipide terbiyeliniwatqan yerlik kadirlirigha yolyoruq bérip, Uyghur élini “Jungxu'a milliti ortaq éngi” berpa qilish namidiki xitaylashturush musapiside téximu zor tirishchanliq körsitishke chaqirghan.

 Halbuki, xitay taratqulirining xewerliride, xitayning 2017-yildin béri yürgüzüwatqan siyasiti amérika hökümiti we bezi gherb parlaméntliri teripidin irqiy hem medeniyet qirghinchiliqi, dep eyibliniwatqan Uyghur élide, shi jinpingning yerlik kadirlardin konkrét yene qandaq tirishchanliqlarni körsitishni telep qilghanliqi tilgha élinmighan. Xitayning xelq'ara teshwiqat qanili bolghan CGTN ning bildürüshiche, shi jinping merkizi partiye mektipi kursantlirigha bergen yolyoruqida, “Partiyening shinjangni idare qilish siyasitini toluq we qet'iy ijra qilish, bu qétimliq terbiyelesh kursi arqiliq rayonda küchlük derijidiki jungxu'a milliti ortaq gewdisi éngi berpa qilish tirishchanliqini téximu qattiq kücheytish” ni telep qilghan.

Shi jinpingning bu yolyoruqining xitay hökümiti yéqinqi heptilerdin béri Uyghur élige munasiwetlik diplomatik we axbarat teshwiqatini téximu keng qanat yaydurushqa bashlighan bir peytte élan qilinishi, diqqet qozghimaqta.

CGTN Ning qeyt qilishiche, shi jinping yene bu nishanni emelge ashurushta “Shinjang Uyghur aptonom rayoni üchün téximu sadaqetmen, téximu durus, mes'uliyetchan we yuqiri iqtidarliq kadirlarni yétishtürüshning zörürlüki” ni alahide tekitligen. Shi jinpingning bu yolyoruqini béyjingdiki merkizi partiye mektipide “Shinjang sinipi” échilip, yerlik millet kadirlarni terbiyeleshke bashlighanliqining 70 yilliqi munasiwiti bilen yollighanliqi, uning yolyoruqini merkizi partiye mektipining mudiri chén shining yetküzgenliki qeyt qilinmaqta.

Shi jinping, bu terbiyelesh pirogrammisining 70 yildin béri Uyghur élini bashqurushta “Intayin muhim rol oynighanliqi” ni éytqan bolsimu, emma 2017-yili uning “Yéngi dewrdiki shinjangni idare qilish istratégiyesi” ijra qilinishqa bashlighandin kéyin, ilgiri merkizi partiye mektipide terbiyelen'gen nurghun Uyghur kadirlirining “Ikki yüzlimichilik” bilen eyiblinip tutqun qilin'ghanliqi melum.