Хитай уйғур елидики пән-техника характерлик карханиларға малийә ярдими беришни қарар қилған

Мухбиримиз әркин
2021-11-12
Share

Хитай даирилири уйғур елида йеңи пул-муамилә механизими қуруп, нуқтилиқ пән-техника характерлиқ карханиларға малийә ярдими беришни қарар қилған. Хитай даирилириниң бу қарариниң хәлқарадики қуяш енергийә тахтилирини өз ичигә алған уйғур мәҗбурий әмгәк мәһсулатлирини чәкләш чуқанлириниң райондики пән-техника характерлик карханиларға көрсәткән тәсири билән мунасивәтлик яки әмәслики мәлум әмәс. Райондики нурғун карханилар һөкүмәтниң "намратлиқтин қутқузуш" намидики мәҗбурий әмгәк программисиға қатнишип, уйғурларни мәҗурий әмгәккә селиш билән әйиблинип кәлгән.

"шинҗаң гезит" ниң хәвәр қилишичә, даириләр уйғур елида "нуқтилиқ пән-техника характерлик карханиларниң ақ тизимлики" түзүмини турғузуп, тизимликкә киргән пән-техника карханилириға қарита қәрзни қайта йеңилаш, қайта һесаплаш сиясити йолға қоюп, уларни мәбләғ җәһәттин қоллашни күчәйтидикән. Даириләр бу арқилиқ пән-техника карханилириниң техника йеңилап, юқури сүпәтлик тәрәққиятиға ярдәм беришни мәқсәт қилғанлиқини тәкитлисиму, бирақ көзәткүчиләр буниң хәлқара имбаргоға учрап қийин әһвалда қалған ширкәтләрни қутқузушқа қаритилған, дәп қаримақта.

Америка бу йил язда хитайниң дунядики әң чоң қуяш ениргийә тахтилири материяли ишләпчиқиридиған хошин шеркитиниң мәһсулатлирини чәклигән. "шинҗаң гезити" ниң ейтишичә, хитай хәлқ банкиси йеқинда райондики алақидар назарәт вә идариләр билән бирлишип, "пән-техникида йеңилиқ яритишқа мәбләғ мулазимитини күчәйтиш тәдбирлири" ни елан қилған. Мәлум болушичә, буниңда "ақ тизимлик" кә киргән карханиларға ​​қәрз өсүмини төвәнлитиштә пәрқлиқ иқтисадий ярдәм берилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт