«Авангарт гезити» ши җинпиңниң мәқсити уйғурларниң кимликини өзгәртиш икәнликини билдүрди

Мухбиримиз әркин
2018-06-18
Елхәт
Пикир
Share
Принт

Һиндистандики «авангарт гезити» дүшәнбә күни уйғурлар һәққидә мақал елан қилип, хитайниң уйғур районидики сияситиниң нишани ялғуз хәлқара вә йәрлик террорлуқ әмәсликини, униң йәнә пәрқлиқ уйғур мусулман кимликини өзгәртишни мәқсәт қилғанлиқини илгири сүрди.

«Хитайниң шинҗаңдики бастуруши» сәрләвһилик мәзкур мақалидә, хитайниң кәң көләмлик бастуруш сиясити йәрликләрдә «үзлүксиз күчийиватқан җазалаш характерлик бастуруш районниң кимликини өзгәртиветиши мумкин» дегән әндишә пәйда қилип келиватқанлиқи тәкитләнгән.

Мақалиниң аптори макхан сайкия, хитай һөкүмитиниң уйғур райониға хитай көчмәнлирини кәң көләмлик йөткиши уйғурларниң наразилиқини қозғап, улардики милләтчиликни күчәйткәнлики, бүгүнки күндә уйғурлар билән хитайлар оттурисидики дүшмәнликниң арқиға қайтиш имкансиз нуқтиға берип йәткәнликини билдүргән.

Мақалида йәнә, ши җинпиңниң мустәмликичилик услубидики сиясити йәрликләрдә җиддийчиликни күчәйтиватқанлиқи әскәртилип: «улар өзлириниң кәлгүсидә уйғур болуп яшишидин барғансери әндишә қилмақта. Уларниң ичидики нурғун кишиләр уйғур болуп яшашниң қанчилик мүшкүллүкини үн-тинсиз ипадиләп кәлди» дейилгән.

Униң көрситишичә, хитайниң қайта тәрбийәләш лагерлири, қолайлиқ сақчи понкити, хизмәт әтрити әвәтиш, торни тазилаш, саламәтлик тәкшүрүш, бирләшмә һәрикәт суписи дегәнләрниң һәммисиниң мәқсити уйғурларни тизгинләш икән.

Аптор мақалисиниң ахирида, «бейҗиңниң йәршари террорлуққа қарши туруш» намида уйғурларға қарши барлиқ бастуруш тәдбирлирини йолға қоюватқанлиқини әскәртип, «бейҗиңниң земин пүтүнлүкини қоғдаш, бөлгүнчиликкә қарши туруши чүшинишлик болсиму, лекин униң шинҗаңдики бир яки барлиқ милләтләргә қарши омумйүзлүк уруш қозғиши узун мәзгилдә сәлбий нәтиҗә бериши мумкин» дейилгән.

Толуқ бәт