Amérika dölet mejlisi Uyghur kishilik hoquq pa'aliyetchiliri bilen söhbet ötküzdi

Muxbirimiz erkin
2018-05-21
Élxet
Pikir
Share
Print

Amérika dölet ishliri ministirliqining démokratiye, kishilik hoquq we emgek bölümi düshenbe küni ikki neper Uyghur kishilik hoquq pa'aliyetchisi bilen Uyghurlarning nöwettiki weziyiti heqqide söhbet ötküzüp, söhbetning neq meydan widiyosini torda tarqatti.

Söhbetke amérika Uyghur kishilik hoquq qurulushining diréktori ömer qanat bilen mezkur organning tetqiqatchisi zübeyre shemshidin qatnashqan. Söhbette Uyghur pa'aliyetchiler xitayning Uyghur rayonida térrorluqqa, ashqunluqqa qarshi qattiq qanun- nizamlarni chiqirip, Uyghurlarni basturushni qanunlashturghanliqi, Uyghur rayonidiki "Yighiwélish lagérliri" ning ehwali qatarliq nöwettiki bir qatar halqiliq mesililerge jawab bergen.
Söhbette ömer qanat "Washin'gton pochta géziti" yekshenbe küni élan qilghan yighiwélish lagérliri heqqidiki bash maqalisini neqil keltürip, delililerning sistémiliq bir medeniyet tazilash qilmishi sadir boluwatqanliqini körsitip bériwatqnaliqi, natsistlarning yighiwélish lagérliri, stalinning gulag lagérlirining hergiz qayta yüz bermesliki kérek, dep qaraydighan kishiler xitayning bu ajayip-gharayip ménge yuyush, türme we ten jazaliri'igha qarshi des turushi kéreklikini tekitligen.

Zübeyre shemshidin "Yighiwélish lagérliri" ning weziyiti heqqide toxtilip, xitay hökümitining bu lagérlarda tutqunlargha rohiy, jismaniy ten jazasi élip bériliwatqanliqi, bu jismaniy, rohiy jazalar kishilerning nérwisining buzulushigha seweb bolghanliqi, bezilerning bu lagérlarda ölgenlikige da'ir xewerlerge érishkenlikini bildürgen. Zübeyre shemshidin yene, bu lagérlarda tutqunlarning diniy étiqadi, kimliki we medeniyitige eyibleshke, tutqunlar yéyishni xalimaydighan tamaqlarni yéyishke mejburlan'ghanliqigha da'ir xewerlerni anglighanliqini bildürgen.

Mezkur söhbet xitayning Uyghur rayonida "Yighiwélish lagérliri" ni qurup, az dégende bir milyondek Uyghurni qamishi amérika axbarat wasitiliri we amérika dölet mejlisining bezi ezalirining jiddiy diqqitini qozghawatqan bir mezgilde ötküzüldi.

Toluq bet