Qaghiliq nahiyesidiki töt yézidin 14 minggha yéqin adem öyliridin köchürüwétilgen

2021-01-07
Share

Xitay hökümitining Uyghur yéza ahalilirini öy-makanliridin köchürüp ularni "Toplap idare qilish" we "Mejburiy emgekchiler" ge aylandurushni dawamlashturuwatqanliqi melum.

4-Yanwar küni xitayning shinxu'a tori tarqatqan bir widiyoluq xewerde éytilishiche, qaghiliq nahiyesining chipan yézisi we kökyar yézisi qatarliq 4 yézisidin hazirghiche 14 minggha yéqin adem köchürüwétilgen. Esli makanlashqan taghliridin köchürüwétilgen yéza ahaliliri hazir "Aqtash" dep nam bérilgen kichik sheherchige orunlashturulghan iken. Xewerde "Aqtash sheherchisi shinjangdiki namratliqtin qutuldurushtiki eng chong köchüsh ornigha aylandi" déyilgen.

Uyghur élidiki peqet 4 yézidinla 14 ming ademning öy-makanliridin köchürüwétilishi chet'ellerdiki közetküchilerning küchlük diqqitini qozghidi. Bu mezkur heriketning kölimining intayin kenglikini körsitip béridiken.

Xewerdiki widiyoluq körünüshte qurghaq bir chöllükte bir-birige oxshash qilip sélin'ghan serengge qépidek öyler körsitilgen we yéza ahaliliri bu yerge köchüp kelgendin kéyin "Ishik aldida ishqa orunliship" muqim xizmet shara'iti we muqim kirimgha érishkenliki ilgiri sürülgen. Körünüshte Uyghurlarning baqmichiliq férmisi, kiyim tikish zawutliri qatarliqlarda ishlewatqan körünüshliri körsitilgen.

Halbuki chet'ellerdiki tetqiqatchilar buni Uyghurlarning yighip bashqurush we mejburiy emgekke sélish, dep bahalimaqta. Xitay hökümiti 2017-yili Uyghur élide bir yaqtin lagérlarni yolgha qoyup 2 milyon etrapida Uyghurni lagérlargha qamighan bolsa, yene bir yaqtin Uyghur yéza ahalilirini öy-makanliridin mejburiy köchürüp, ularning tebi'iy yashash yollirini yoqitishni tizlatqan we ularni qul emgekchilerge aylandurghan idi.

Nöwette Uyghurlarning mejburiy emgekke sélinish mesilisi xelq'arada küchlük inkas qozghawatqan muhim mesile bolup qaldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet