«ئامېرىكا ئۇيغۇر لوڭقىسى» نى تالىشىش پۇتبول مۇسابىقىسى 2-كۈنىگە قەدەم قويدى
2018.07.06
ئامېرىكىنىڭ ۋىرجىنىيە شتاتىدا ئۆتكۈزۈلۈۋاتقان 4-نۆۋەتلىك «ئامېرىكا ئۇيغۇر لوڭقىسى» نى تالىشىش پوتبۇل مۇسابىقىسى پەيشەنبە كۈنى 2-كۈنىگە قەدەم قويدى.
شۇ كۈنكى مۇسابىقىدە 6 كوماندا 3 مەيدان مۇسابىقە ئوينىدى. «ئۇيغۇر بىرلىكى كوماندىسى» بىلەن «بوستون-نيۇ-يوركتىكى يورك بىرلەشمە كوماندىسى»، «كانادا بوغدا كوماندىسى بىلەن سان-فرانسىسكو ئۇيغۇر پوتبۇل كۇلۇبى كوماندىسى» ۋە «ۋىرجىنىيە تەكلىماكان كوماندىسى» بىلەن «لوس-ئانجېلىس ئۇيغۇر پوتبۇل كۇلۇبى كوماندىسى» ئۆز-ئارا مۇسابىقىلەشتى.
مۇسابىقىدە «ئۇيغۇر بىرلىكى كوماندىسى» بىلەن «بوستون-نيۇ يورك بىرلەشمە كوماندىسى» 2 گە قارشى 2 نەتىجە بىلەن تەڭلىشىپ قالدى. «لوس-ئانجېلىس ئۇيغۇر كۇلۇبى كوماندىسى» نۆلگە قارشى بىر نەتىجە بىلەن «ۋىرجىنىيە تەكلىماكان كوماندىسى» نى، «كانادا بوغدا كوماندىسى» نۆلگە قارشى 7 نەتىجە بىلەن «سان-فرانسېسكو ئۇيغۇر كۇلۇبى كوماندىسى» نى ئۇتۇۋالدى.
مۇسابىقە باشلىنىپ ھازىرغا قەدەر جەمئىي 6 مەيدان توپ ئوينالدى. لېكىن بۇ مۇسابىقىلەردە «ئۇيغۇر بىرلىكى كوماندىسى» بىلەن «كانادا بوغدا كوماندىسى» ھېچكىمگە ئۇتتۇرۇپ باقمىدى. 4-ئىيۇلدىكى مۇسابىقىدە «ئۇيغۇر بىرلىكى كوماندىسى» «سان-فرانسېسكو ئۇيغۇر كۇلۇبى» نى، «كانادا بوغدا كوماندىسى» «بوستون-نيۇ-يوركتىكى يورك بىرلەشمە كوماندىسى» نى ئۇتۇۋالدى. بۇ ئىككى كوماندا جۈمە كۈنى مۇسابىقىگە چۈشىدىكەن. جۈمە كۈنى يەنە «سان-فرانسېسكو ئۇيغۇر كۇلۇبى» بىلەن «بوستون-نيۇ-يوركتىكى يورك بىرلەشمە كوماندىسى»، «مارىلاند ئۇيغۇر كوماندىسى» بىلەن «لوس-ئانجېلىس ئۇيغۇر كۇلۇبى كوماندىسى» مۇسابىقىلىشدىكەن.
«ئامېرىكا ئۇيغۇر لوڭقىسى» نى تالىشىش پۇتبول مۇسابىقىسى 2015- يىلى تەسىس قىلىنغاندىن بېرى ھەر يىلى يازدا ئۆتكۈزۈلۈپ كەلمەكتە. بۇ مۇسابىقە ھازىر شىمالىي ئامېرىكا قىتئەسىدىكى ئۇيغۇرلارنىڭ ئۆز-ئارا ئۇچرىشىدىغان، پەرزەنتلىرىگە ئۇيغۇر مىللىي ئەنئەنىلىرىنى سىڭدۈرىدىغان مۇھىم پائالىيەت سورۇنىغا ئايلاندى.